18 kale ikuskizun artistiko eskainiko dira Aste Nagusirako

Kaleko Antzerkiaren eta Arte Eszenikoen eskutik, 18 ikuskizun artistiko eskainiko dira abuztuaren 22tik 28ra, 17 konpainien eskutik. Gas Plaza eta Casilda Iturrizar Parkeko Txikigunea finkatutako guneak izango dira.

Estreinaldiek, muntaia bereziek eta sari ospetsuak jaso dituzten obrek laburbiltzen dute Aste Nagusiko Kaleko Antzerki eta Arte Eszeniko programazioa, “originaltasunarekin eta dibertsioarekin nahitaezko hitzordua, kartelak erakusten duen maila handiarengatik”.

Izan ere, kalitate handiko doako ikuskizunak izango dira, ikus-entzule guztiei zuzendutako musika, magia, akrobaziak, clowna eta umore asko uztartzen dituztenak, goizeko zein arratsaldeko saioetan.

Nazioartean ospe handia duten antzezpenak nabarmentzen dira, baita euskal konpainia ugari eta euskarazko lanak ere, bai eta emakumeak eta dibertsitate funtzionala duten pertsonak egindakoak ere, euren proposamenekin ikus-entzuleak hotz utziko ez dituzten lanak, hain zuzen ere.

Aurkezpena programazio hori hartuko duen guneetako batean egin da, Gas Plazan. Bertan, GANSO & CÍAk “Panoli Kabareta” lanaren zati labur bat eskaini du. Clown ikuskizun horrek jaietan izango du pase osoa, hilaren 22an, 13:15ean.

BI ESTREINALDI, SARITUTAKO LANAK ETA MUNTAIA BEREZIENAK

2022ko Aste Nagusiko Kaleko Antzerki eta Arte Eszenikoen programazioak bi ikuskizunen estreinaldia ekarriko du Bizkaiko hiriburura: “Gora bihotzak!”, Eidabe (Euskadi) konpainiarena, eta “Nüshu”, 5 emakumez osatutako Cía. Capicúa-rena (Katalunia-Aragoi). Igandean, hilak 21, taularatuko dira Txikigunean, 19:30ean, eta asteazkenean, hilak 24, Gas Plazan, 13:30ean eta 21:15ean, hurrenez hurren.

Sari gehien jaso dituzten lanen artean, Circo Social-Zirkòlika Sarien 2021eko II. Edizioan saritutako MUR konpainiaren (Katalunia) “De tú a tú” azpimarratu behar da. Aniztasun funtzionala duten artista taldeak parte hartzen duen proiektua da. Larunbatean, hilak 27, taularatuko da Gas plazan 13:30ean eta 21:15ean.

Muntaia berezienen artean, Vaiven Circoren (Andaluzia) “Esencial” dago, igandean, hilak 27, 21:15ean, Gas Plazan. Obraren oinarrian dagoen elementu eszeniko berezia “Waldorf ostadar” jostailua da.

Beste eszenaratze harrigarrienetako bat Markeliñe euskal konpainiaren “Psike” izango da, argiz, kez eta pirotekniaz betea, Gas Plazan, astelehenean, hilak 22, 21:15ean. Double Take Cinematic Circus-en (Belgika) “Jump cut” eszenografia guztiz deigarria da, emanaldia inguratzen duen eta eszenako elementu gisa erabiltzen den tren baten bidez, ostiralean, hilak 26, 21:15ean, Gas plazan.