Asteazken honetan Bilboko Udaleko Gobernu Batzordeak Peñascaleko Plan Berezia onetsi du, non 223 etxebizitza ordeztea aurreikusi den –83 atari edo familia bakarreko etxebizitza eraistea–, eta 218 etxebizitza berri eta 242 garaje-plaza eraikitzea sotoan, beheko solairuan eta lehenengo solairuan. Peñascaleko Plan Berezi honek Auzoaren etorkizun urbanistikoa jasotzen du eta bertan bizilagunek egindako ekarpenak agertzen dira.
Parte-hartze bidezko prozesu hori urteko azken hiruhilekoan egin zuten Udalak eta Eusko Jaurlaritzak eta, hain zuzen ere, formula horren bidez bi erakundeek Peñascaleko bizilagunei bizitokirako kontuan hartzen ziren hiri-diseinuaren alternatibak helarazi zizkieten. Ondoren, auzotarren iritziak eta kezkak jaso eta gestionatu zituzten. Zehazki, hiru aukera planteatu ziren. Eta Peñascaleko Plan Bereziak orain jasotzen duen proposamena aukera horietako hirugarrenaren (C aukera) bilakaera da, behin parte-hartze bidezko prozesuan herritarrek egindako ekarpenak gehituta.
Bizitegi-eraikin gehienak mendebaldeko hegalean daude, zortzi bloketan (bost solairuko bat, lau solairuko bat, zazpi solairuko bost eta zortzi solairuko bat, eremuaren hegoaldean). Eta ekialdean beste bi bloke proposatzen dira mehelinak errematatzeko (bost eta lau solairukoak, alboko eraikinen altuerara egokituak). Horrela, mantentze-gastuak murriztuko dira.
Guztira, 223 etxebizitza ordeztea aurreikusi da –83 atari edo familia bakarreko etxebizitza eraistea–, eta 218 etxebizitza berri eta 242 garaje-plaza eraikitzea sotoan, beheko solairuan eta lehenengo solairuan.
Horrek esan nahi du 18.400 metro karratuko bizitegi-sabai berria eta 9.600 metro karratuko sabaia erabilera osagarrietarako (garajeak, trastelekuak, etab.), eta 140 metro karratu, hirugarren sektoreko erabilerarako.
1.350 metro karratuko lurzorua gordeko da bihar-etzi ekipamenduetarako erabiltzeko, eta 7.870 metro karratu espazio libreetarako eta berdeguneetarako.
Bero-uhartearen efektua saihestu nahi da, zuhaitzak eta landareak jarriz eta mendi-hegalak birnaturalizatuz. Era berean, drainatze urbano jasangarriko irtenbideak sustatuko dira urbanizazioan, uholderik egon ez dadin.
Proposamen honetan lehentasuna ematen zaio oinezkoen mugikortasunari eta espazio publiko eta plaza berriak eratuko dira.