Alarde Publikoaren Meaka konpainiak mendi martxa antolatu du iganderako

Irungo Alarde Publikoak 27 urte beteko dituen honetan, hamairugarren konpainia bat gehituko zaio: Meaka konpainia berria “ilusioz beterik” doa San Martzial egunerako bidean. Hiru hilabete eskas geratzen dira udalerriko jaiak ospatzeko eta buru belarri dabil prestaketa lanetan. 2024ko irailean lehenengo batzarra egin eta konpainia bezala eratu zenetik, aurrerapauso asko eman dituzte.

Alde batetik, logotipoaren eta banderatxoaren diseinuak egin dituzte. Biek lotura zuzena dute Meaka auzoaren ingurunearekin. Logotipoan auzoa ureztatzen duen Arantzate erreka agertzeaz gain, Irugurutzetako labeek dute protagonismo nagusia. Banderatxoan, aldiz, Aiako Harriaren profila diseinatu dute, auzoa mendiaren magalean baitago.

Halaber, pasa den otsailean konpainiako agintariak aukeratu ziren: Nagore Olaskoaga Alsua kapitainarekin batera, Nerea Pino Rivas arituko da teniente lanetan eta Anne Gomez Amiano alferez bezala. Hala ere, “ardura guztia ez dagoela soilik haien gain” azpimarratu dute, izan ere, konpainia honen esentzia talde lana dela nabarmendu nahi dute.

Anne Gómez alfereza, Nagore Olaskoaga kapitaina eta Nerea Pino tenientea. N.G.

Ildo beretik, kideen arteko adostasuna erdietsi ondoren, konpainiak San Pedro eta San Martzial egunetarako izango dituen kontzentrazio-lekuak erabaki ditu: bi kasuetan Ola sagardotegia izango da. Era berean, armak ikuskatzeko lekua ere erabaki dute, Juanita jatetxearen parean hain zuzen ere.

Mendi martxa igande honetan

Egitasmo ludikoagoek ere tokia dute konpainiaren ibilbidean. Joan den otsailaren 1ean lagunarteko bazkaria egin zuten auzoan, haien burua konpainiako partaide gisa aitortzeko. Lortutako erantzuna “ezinhobea” izan zela adierazi dute, eta bertan jadanik beste konpainia batzuetan urteak desfilatzen daramatzatenak, nahiz lehenengoz parte hartuko dutenak elkartu zirela.

Orduko arrakasta errepikatzeko asmoz, igande honetarako mendi martxa bat antolatu dute. Meaka Auzo Elkartea abiapuntu izango duten bi ibilbide zirkular egongo dira, bata luzeagoa eta bestea motzagoa, bakoitzak erabakiko du zein egin. Luzeak 7 km inguru izango ditu eta Aldabe, Saroia, Arantzateko dorrea, Ibarburu edo Ibaieta bezalako baserrien ondotik igaroko da. Honako ibilbidea egiteko irteera ordua 09.45 izango da. 

Bestalde, motza 3,5 km ingurukoa izango da da. Familia osoarekin egiteko parada eskaintzen duen ibilbide honi 10.30ean emango zaio hasiera. Ondoren, 12.00ak aldera pintxo-potea eskainiko da auzo elkarteko tabernan.

Honakoa “auzoan barrena ibiltzeko aukera paregabea” dela azaldu dute. Ekitaldiak konpainia osatuko duten pertsonak elkartzeko helburua badu ere, eta “tarte atsegina eta giro onean” pasa nahi duen edonor gonbidatuta dago.

Musika tailerrak

Ekainaren 7a arte, larunbatero musika tailerrak eskainiko dituzte Arbesko Toki Alai HH eskolan, 10.30etik 12.30era. Horrela, Meaka konpainiarekin Alardean parte hartu nahi duenak musika instrumenturen bat jotzen ikasteko aukera eduki dezan bermatu nahi dute. Hala ere, konpainian desfilatuko duten pertsonei zuzenduta egoteaz gain, tailer hauek izaera irekia dute eta nahi duen oro gertura daiteke bertara.

Bukatzeko, hurrengo hitzordua kantinera aukeraketa izango dela aurreratu dute, maiatzeko lehenengo hamabostaldian.