Arabako Aldundiak 752.000 euro bideratuko ditu enpresek eskatutako arloetako prestakuntza ikastaroetara

Actualizado hace 10 minutos

Arabako Foru Aldundiko Enplegu, Merkataritza eta Turismo Sustapenerako Sailak 752.412 euro bideratuko ditu prestakuntza ikastaroetara, arabar guztien eta, bereziki, langabezian daudenen kualifikazioa eta enplegagarritasuna hobetzeko. Lurraldeko ekoizpen sareak eskatutako lanbide arloei buruzkoak izango dira finantzatutako ikastaroak.

Foru erakundetik zehaztu dutenez, 630.000 eurorekin finantzatuko dira irabazi asmorik gabeko prestakuntza zentroak, fakultateak eta unibertsitate eskolak, bai eta sektoreko beste erakunde batzuk ere, prestakuntza ikastaroak diseinatu eta abiatzeko. Aurrekontu horretatik 30.000 euro teknologia berriei, kudeaketa tresnei eta industria jarduerari buruzko zabalkunde jardunaldiak eta mintegiak antolatzeko izango dira.

Lehenengo deialdi horren ondoren, hurrengo asteetan, 122.412 euroko beste bat egingo da, kuadrillei eskualde bakoitzeko enpresen egitura ekonomikora eta premietara egokitutako prestakuntza eskaintza osagarria sustatzeko diru laguntzak emateko.

Enplegu, Merkataritza eta Turismo Sailak 10 eta 100 ordu arteko prestakuntza ikastaroak finantzatuko ditu bi deialdien bidez, modalitate presentzialean, sarean eta teleprestakuntzan. Teleprestakuntza pandemian hasi zen eskaintzen, eta arabar guztiek parte hartu ahal izatea du helburu, haien ordutegia eta bizilekua edozein izanik ere.

ARABAKO FORU ALDUNDIA

Bestalde, Arabako Foru Ogasunak zergadunei arreta emateko zerbitzua handituko du, lehen banku erakunde bat zegoen lekuan kokatuz. Egoitzaren beheko solairuan dago gunea, eta iaz erosi zuen foru erakundeak.

Horrela, Arabako Aldunditik jakinarazi dutenez, bi zerbitzu bateratu ahal izango dira, erositako lokalak ahalbidetzen duen handitzeari esker, Errolda Kudeaketako eta Jakinarazpenetako Unitatearen Atala beheko solairuan kokatu ahal izango delako, eta errolda unitatea aldatzean hutsik geratuko den lekuan, berriz, orain beste solairu batean dagoen Zeharkako Zergen Zerbitzuaren zati bat jarriko delako.