Arabako Aldundiko Gizarte Politiken Sailari atxikitako Gizarte Ongizaterako Foru Erakundeak aurten abiatuko diren hiru gizarte baliabide berriren zerbitzuak kontratatzeko espedienteak onetsi ditu: adimen desgaitasuna duten pertsonentzako Lakondoa zentroa, gizarte inklusioko egoitza zerbitzu eta eguneko zerbitzu berria eta Etxean Bai planaren etorkizuneko erreferentzia zentroa.
Foru erakundeko iturriek jakinarazi dutenez, Arratzua-Ubarrundian dagoen Lakondoa eguneko eta egoitzako arreta zentroa adimen desgaitasuna duten pertsonei laguntzeko eta haien laguntza premiei erantzuteko baliabide berria izango da.
Gainera, egoitza zerbitzuak bizileku iraunkorra eta atsedenerako gelak eskainiko dizkie laguntzadun etxebizitzetatik eskaini daitezkeenak baino intentsitate handiagoko laguntzak behar dituzten pertsonei.
Lakondoak 32 plaza izango ditu, hau da, 12 egoitzakoak (11 arrunt eta atsedenerako bat) eta 20 eguneko arretakoak. Gizarte Ongizaterako Foru Erakundearen administrazio kontseiluak onetsitako kontratuaren aurrekontua 1.521.507 euro da, urtebeterako. Uste da jarduera urteko azken lauhilekoan hasiko dela.
Era berean, beste urrats bat egin da Etxean Bai planaren etorkizuneko erreferentzia zentrorako. Gasteizko Manuel Iradier kalean egongo da, eta mendekotasuna, desgaitasuna edo gaixotasun mentala duten eta beren etxean bizi diren pertsonei zuzenduko zaie.
Zerbitzuaren bidez, erantzuna eman nahi zaio arabar gehienek beren etxean bizitzen jarraitzeko duten nahiari, adierazi dezaketen mendekotasuna edo desgaitasuna gorabehera.
Kontratuaren aurrekontua 2.882.307 euro da, eta hiru urteko iraupena izango du. Aurreikuspenen arabera, datorren irailean hasiko da martxan, egokitze lanak eta ekipamendua amaituta.
Azkenik, Gizarte Ongizaterako Foru Erakundearen administrazio kontseiluak Gasteizen gizarte esklusio egoeran dauden pertsonentzako egoitza zerbitzu eta eguneko zerbitzu berri baten lizitazioa ere onetsi du. Zerbitzuak 14 egoitza plaza eta eguneko zentroko beste 10 izango ditu. Kontratuaren aurrekontua 2,8 milioi euro da, bi urterako, eta aurreikusi da urrian hastea.