Arabako Larrialdietako Funtsa aktibatu dute

Guztira, 146.986 euro. Horixe da, hain zuzen, Arabatik bideratuko den diru-kopurua larrialdi humanitarioen aurrean premia handiena dutenei laguntzeko. Horrela, Arabak Larrialdietarako Arabako Funtsa aktibatu du, Sirian, Kamerunen eta Ruandan sortutako larrialdi humanitarioei aurre egingo dieten lau proiekturi laguntzeko. Gasteizko Udaleko eta Arabako Foru Aldundiko erakunde publikoek eskaintzen duten laguntza da.

Hala, Gasteizko Udaletik gaur bertan azaldu dutenez, Larrialdietarako Arabako Funtsa 50.000 euro bideratuko ditu Unicefen Espainiako Batzordeak Siriarako aurkeztutako proiektura. Lurrikarek kaltetutako biztanleen artean oinarrizko nutrizio-beharrak asetzea eta uraren bidez kutsa daitezkeen gaixotasunak prebenitzea du helburu proiektuak; horretarako, horiek eskuratzea erraztuko du, eta saneamendu eta higiene egokiak eskainiko ditu. Proiektu honen bidez 5,4 milioi pertsonarengana iristea espero da; horietatik 2,6 milioi haurrak dira.

Kamerunen kasuan, "Larrialdietarako Arabako Funtsak 52.000 euro bideratuko ditu Nazioarteko Elkartasuna elkarteak eta Afrika Miniaturan Elkarte Soziokulturalak aurkeztutako eskaerara; indarkeria armatuaren ondorioz Souzara mugitutako biztanleria zibila artatzeko erabiliko dute diru hori. 2.000 pertsona baino zertxobait gehiagori elikagaiak, lehen sorospenerako materiala eta oinarrizko higiene-produktuak eskaintzea dute helburu", azaldu dute.

Azkenik, Arabako Médicus Mundik 30.000 euro jasoko ditu Kongoko Errepublika Demokratikoaren ekialdeko gatazka armatuen ondorioz Ruandako mendebaldeko probintziara lekualdatutako biztanleria zibila artatzeko proiektu baterako. Ruvabu herrian bizi diren 100 familiarentzat elikagai sortak eta premiazko beste produktu batzuk erosteko erabiliko dute diru hori. Bestalde, lurrikaren biktima siriarrei funtseko beste 14.986 euro bideratzea onartu dute Udalak eta Aldundiak.