Arabako Foru Ogasunak zergadunei arreta emateko zerbitzua handituko du, lehen banku erakunde bat zegoen lekuan kokatuz. Egoitzaren beheko solairuan dago gunea, eta iaz erosi zuen foru erakundeak.
Horrela, Arabako Aldunditik jakinarazi dutenez, bi zerbitzu bateratu ahal izango dira, erositako lokalak ahalbidetzen duen handitzeari esker, Errolda Kudeaketako eta Jakinarazpenetako Unitatearen Atala beheko solairuan kokatu ahal izango delako, eta errolda unitatea aldatzean hutsik geratuko den lekuan, berriz, orain beste solairu batean dagoen Zeharkako Zergen Zerbitzuaren zati bat jarriko delako.
Hala, "zergadunei arreta pertsonalizatua, azkarra, hurbila eta kalitatezkoa eskaintzen jarraitu ahal izango da", Itziar Gonzalo Ogasun, Finantza eta Aurrekontu Saileko foru diputatuak ziurtatu duenez.
Gaur egun, hiru zerbitzu daude eraikineko bi solairutan banatuta: Zergadunekiko Harremanetarako Zerbitzua, beheko eta lehenengo solairuetan; Zeharkako Zergen Zerbitzua, lehen eta hirugarren solairuetan; Zuzeneko Zergen Zerbitzua, beheko eta bigarren solairuetan.
"Horrek ez du lana gauzatzea zailtzen, baina lanaren kudeaketa eta antolaketa hobetu egiten dira zerbitzua erabat bateratuta dagoenean", azaldu du foru diputatuak.
Azken urteotan nabarmen ugaritu dira Arabako Foru Ogasunaren jarduerak: zerga berriak kudeatzen dira, beste administrazio batzuei arreta eta laguntza eman behar zaie beste erakunde batzuetatik sortutako laguntzak ebazteko, Europako eskakizunetara egokitu beharra dago eta "hainbat esparrutatik gero eta sarriago egiten diren zerga informazioko eskaerei erantzun behar zaie".
Hori dela eta, Gonzalezek nabarmendu duenez, "arinago eta modu eraginkorragoan erantzun beharra dago" eta, horretarako, gune fisikoak egokitu behar dira.