Ardoaren sektorea indartzeko lan desberdinak

Edariak eta Ardoa (EDA) Drinks & Wine Campus Eusko Jaurlaritzak eta Arabako Foru Aldundiak sustatutako eta Basque Culinary Centerrek garatutako zentroa da, eta 2025ean jarriko da martxan Araban. Hala, bi egoitza izango ditu: bata Gasteizen eta bestea Arabako Errioxan. Bi tokiak kokatzeko lanean ari dira. "Arabak lotura estua du mahastizaintzaren eta ardogintzaren munduarekin, eta EDA Drinks & Wine Campus kokatzeko gune paregabe da. Ezagutzan oinarritutako zentro aitzindaria izango da, ekonomiaren sektore estrategiko baterako, eta lankidetza publiko-pribatuaren adibidea. Horren bidez, lurraldearen garapen ekonomikoa eta soziala sustatuko dira, bikaintasunetik abiatuta; Euskadiko ardogintzaren esparrua eta ardoaren kultura bultzatzeaz gain, txakolinaren, sagardoaren eta garagardoen esparrua ere sustatuko ditu, eta beverage unibertsoaren alderdi guztiak landuko eta garatuko ditu nazioartean", azaldu dute Eusko Jaurlaritzatik.

Bestalde, prestakuntza-planak bat egiten du gastronomiaren 360 graduko ikuspegiarekin, diziplinarteko prestakuntzarekin. Ikasketa-testuinguru horren barruan, ikasleek ezagutzak lortuko dituzte irakasgaiei buruz, zeharka, hezkuntza-eredu "berritzaile" eta "praktiko" baten bidez. Era berean, ikasketa-planak zeharkako ikuspegia izango du egungo eta etorkizuneko edariei dagokienez. Ardoaz gain, aintzat hartuko ditu potentzial handiko beste edari batzuk, hala nola garagardoa, alkoholik gabeko edariak eta edari hartzituak eta destilatuak, besteak beste; horrela, lotura-zubiak eta sinergiak eraikiko dira, berrikuntza eta jasangarritasuna gako akademiko gisa hartuta.