"Ariketa aretoak hiri osoan zehar banatuta izateak gure bizilagunei gehien komeni zaienera hurbiltzea eta sasoian mantentzea errazten die"

Gasteizko Udaleko Kirol Zerbitzuak Jarduera Fisikoaren Astea antolatu du, apirilaren 6an ospatuko den Jarduera Fisikoaren Nazioarteko Eguna dela eta, eta ate irekien jardunaldiak egingo dira herritarrek gizarte etxeetan eta kiroldegietan dauden 11 ariketa aretoak ezagutu ditzaten. Ekimena martxoaren 31n hasi eta apirilaren 6an amaituko da.

Ana Lopez de Uralde Gasteizko Udaleko Kirol zinegotziak azaldu duenez, "Kirol Zerbitzuak ekimen hau martxan jartzea erabaki du herritarrek udal-baliabide hau ezagutu dezaten. Horri esker, herritarrek, urte osoan zehar, makinekin jarduera fisikoa egin dezakete prezio sinbolikoaren truke".

"Ariketa aretoak hiri osoan zehar banatuta izateak gure bizilagunei gehien komeni zaienera hurbiltzea eta sasoian mantentzea errazten die", gaineratu du.

Gasteizek 11 udal ariketa areto ditu Hegoaldeko, Zabalganako, Iparraldeko, Landatxoko, Ibaiondoko eta Lakuako gizarte etxeetan eta Aranalde, Ariznabarra, Landazuri, Arriaga eta Abetxukoko kiroldegietan.

Bizikleta estatikoak, zintak, eliptikoak, arraun makinak, banda elastikoak eta horma barrak dituzte, bai eta informazio kartelak kontsultagai ere, indar ariketak eta luzaketak nola egin azaltzeko, besteak beste.

Ate irekien astean zehar, ariketa geletan begiraleak izango dira hainbat ordutegitan. Sarrera doakoa izango da, baina harpideduta ez daudenek gizarte etxe edo kiroldegira sartzeagatik ordaindu beharko dute, urte osoan bezala: 1,20 euro da 18 urtetik beherakoek eta 2,20 eurokoa 18 urtetik gorakoek. Urteko gainerako egunetan, ekitaldi aretoetarako sarrera 0,50 euro da herritar guztientzat.