Urte berriarekin batera, Azkoitiko Oteiza pilota elkarteak Atano III.a buruz buruko txapelketa martxan jartzeko asmoa du. Guztira, sei mailatan jokatuko dituzte parte-hartzaileek partidak herriko Gurea pilotalekuan, eta lehiatzeko asmoa dutenek hilaren 15era bitartean eman dezakete izena.
Aurten XLVIII. edizioa beteko du ibilbide luzea duen txapelketa honek. Ohi den moduan, honako maila hauetan jokatuko dituzte partidak: aurre benjaminak (2015ean jaiotakoak), benjaminak I (2014an jaiotakoak), benjaminak II (2013an jaiotakoak), kimuak I (2012an jaiotakoak), kimuak II (2011n jaiotakoak) eta infantilak (2010ean jaiotakoak). Gainera, maila guztietan, neskek zein mutilek parte hartu dezakete.
Pilotei dagokienez, lehen hiru mailetakoek pilota goxoarekin jokatuko dituzte partidak, eta azken hiru mailetakoek, aldiz, mistoarekin.
Pilotariek Gurea pilotalekuan jokatuko dituzte norgehiagokak eta denek galtza zuriarekin jokatu beharko dute. Era berean, jakinarazi dutenez, ez dituzte partidak atzeratuko, “arrazoi garrantzitsurik” (gaixotasuna edo medikuarekin zita) ez badago. Aurrerago emango da egitarauaren berri.