Ba al zenekien SOS Deiak aplikazioan pertsonak geolokalizatzeko sistema bat dagoela, bilaketa-, erreskate- eta laguntza-denborak laburtzeko aukera ematen duena? Borondatez aktibatzen da, eta SOS Deiak zerbitzuak laguntza eskatzen duten pertsonen azken mugimenduetan egindako trazadurara sartzeko aukera du. Halaber, aplikazioak aukera ematen du, borondatez, egoki iritzitako datu mediko edo pertsonalak sartzeko, Larrialdiak Koordinatzeko Zentroak seguruago jardun dezan pertsona bat arriskuan dagoenean. Gainera, aukera ematen du hirugarrenen kontaktu bat edo gehiago emateko, Euskadiko Larrialdiak Koordinatzeko Zentroak larrialdiren bat gertatuz gero abisatu ahal izan diezaien.
"Aplikazioa oso baliagarria da, eta adinekoak, kirola bakarrik egiten duten eta mendira bakarrik irteten diren pertsonak… zaintzeko diseinatuta dago", azaldu zuten Eusko Jaurlaritzaren Segurtasun sailetik.
Berrikuntza moduan, hedatzen hasi diren ikus-entzuneko materialetan emakumeen babesa nabarmentzen da. Zehazki, App de SOS Deiak aplikazioak Sexu-erasoa eta Genero-indarkeria izeneko bi esteka zuzen ditu. Bi aukeretako edozein sakatuz, aplikazioak zuzenean bidaltzen du Euskadiko Larrialdiak Koordinatzeko Zentrora laguntza eskatu duen emakumearen seinale geolokalizatu bat. Deia zuzenean sartzen da katalogatuta, eta horrek "izugarri errazten eta sinplifikatzen du laguntza eskatzen ari den emakumearen tratamendua, bilaketa eta erreskatea".
App de SOS Deiak aplikazioa erabat doakoa da, eta Android eta iOS sistemetan jaits daiteke bai euskaraz bai gaztelaniaz. Gainera, txat-sistema bat ere badu entzuteko edo hitz egiteko arazoak dituzten pertsonentzat.