Barakaldoko Udalak (Bizkaia) hiri udalekuak antolatuko ditu aurtengo Aste Santuan ere, apirilaren 22tik 25era, eta 3 eta 11 urte bitarteko haurrentzako 180 plaza eskainiko ditu. Udalekuak euskaraz izango dira, eta izena emateko epea otsailaren 10etik 14ra arte egongo da zabalik Barakaldoko Udalaren egoitza elektronikoan, 010 telefonoan, zentro zibikoetan eta kultur etxeetan. Plazen zozketa otsailaren 18an egingo da, eta %5 gutxienez %33ko desgaitasuna aitortua duten dibertsitate funtzionala duten umeentzat gordeko da.
Nerea Cantero Barakaldoko Udaleko Kultura zinegotziak jakinarazi duenez, 180 plazak Juan Ramon Jimenez (36), El Pilar (72) eta Arteagabeitia (72) zentroen artean banatuko dira, eta jantoki zerbitzua aukerakoa izango da. Udalekuetan 08:15etik 09:00etara sartuko dira umeak; jantokian geratzen ez direnentzat 14:00etatik 14:15era izango da irteera, eta bazkari zerbitzua erabiltzen dutenentzat, aldiz, 15:00etatik 15:15era.
Udalekuetan deskontuak izaten dira, jardueran seme edo alaba bat baino gehiago apuntatzen direlako, hori baitzen barakaldoarrek egiten zuten eskaera nagusietako bat. Neurri hori 2020an gauzatu zen, eta seme-alaba bakoitzeko familia diru sarreren arabera dagokiona baino tarte txikiagoa aplikatzean oinarritzen da.
Gainera, udalekuen prezioa progresibitate sozialaren kontzeptuen arabera finkatuta dago, gutxien dutenek gutxiago ordain dezaten, eta ez da jantokiarekin edo jantokirik gabe aldatuko errenta txikieneko tarteen artean. Hala egingo du, ordea, errenta handienetarako ezarritako prezioetan, 22,08 euro eta 39, 32 euro bitartekoa baita jantokirik gabekoetan, eta 26,40 euro eta 47,92 euro artekoa jantokia barne.