Urteko sasoi honetan ohikoak diren asfaltatzen lanei ekingo die Beasaingo Udalak. Izan ere, udalerria besaindarren beharretara egokitu nahi du Leire Artolaren gobernu taldeak, bertan dauden azpiegiturak eta euskarriak baldintza egokietan mantenduz.
Asfaltatze kanpainari hasiera emateko, lehendabizi birgaitze premia duten eremuen azterketa egin eta berritzeko beharra dutenak antzeman dira. Lehentasunaren arabera, beraz, Oriako Pasealekua; Ezkiagako parkinga eta bere sarrera (asfalto inprimatua); eta Dulce Maria Loinaz 12 izango dira aurten asfaltatuko diren eremuak.
Asfaltatze lanak gaur hasiko dira, uztailaren 26an, eta abuztuaren 5a bitartean gauzatuko dira. UTE Amenabar Alvar González enpresari esleitu zaizkio obrak, 51.767,29 euroko prezioan.
Lanak Aurrera
Asfaltatze lan hauek udalerriko kaleak eta errepideak berritzeko eta mantentzeko egiten ari diren obrei jarraipena emango die. Besteak beste, bukatu berri diren Oriamendi kaleko eta Erauskin Plazako lanei segida emango die. Asmoa, herritarren bizi kalitatea hobetzea da. – E.C.A.