Bi pertsona atxilotu ditu Ertzaintzak Bilboko etxebizitza baten lapurretan izan duten ustezko inplikazioagatik. Eusko Jaurlaritzako Segurtasun Sailak gaur jakinarazi duenez, gertakari hori atzo arratsaldeko seiak inguruan gertatu zen, Ertzaintzak bi pertsona susmagarriren abisua jaso zuenean Zabala auzoko etxebizitza baten inguruan.
Hala, eta ildo beretik, Eusko Jaurlaritzak azaldu duenez, "atzo, larunbata, arratsaldeko seiak baino lehentxeago, Ertzaintzari jakinarazi zioten Bizkaiko hiriburuko Zabala auzoko etxebizitza batetik gertu pertsona batzuk zeudela, jarrera susmagarrian. Berehala, herritarren babeserako patruila bat bertaratu zen, eta ikusi zuten adierazitako eraikineko etxabe bateko ateak palanka-efektuaren zantzu nabarmenak zituela", eta gaineratu zuten: "Aldi berean, agenteek ikusi zuten inguruan zeuden bi gizonek une horretan zeramatzaten hainbat objektu ibilgailu baten azpian bota zituztela, handik alde egitera zihoazela".
"Susmagarriak geldiarazi zituzten, eta egiaztatu zuten ezkutatzen saiatzen ari ziren materiala tresna batzuk zirela, eta, ustez, tresna horiek erabili zituztela adierazitako etxera sartzen saiatzeko". Hori dela eta, atxilotu egin zituzten, etxebizitzan indarrez lapurtzea egotzita. Beharrezko izapideak egiten ari ziren bitartean, inguruan bikote bat ikusi zuten, zelatan, eta atxilotuekin telefonoz harremanetan jartzen saiatu ziren. Horregatik, identifikatu egin zituzten. "Beharrezko egiaztapenak egin ondoren, eginbideak ireki zitzaizkien pertsona horiei, delitu beragatik ikertu gisa".