Bidasoa-Irun, Europan sendo errotuta

Bidasoak laugarren urtez jarraian ziurtatu du kontinentean jokatzea

Larunbatean Fraikin Granollersen aurka lortutako garaipenarekin Asobal Ligako bigarren postua berreskuratzeaz gain, Bidasoa-Irunek matematikoki ziurtatu zuen laugarren urtez jarraian Europako txapelketa bat jokatzeko sailkapena.

90eko hamarkadaz geroztik ez zen horrelako balentriarik erdietsi, 1993tik 1997ra bost aldiz jarraian lortu bai-tzuen Europan jokatzeko txartela.

Oraingoz, lau dira Liga bitartez Europako txapelketetara sartzeko aukera emango duten plazak, Errege Kopako txapelduna eta txapeldunordea Barça eta Granollers baitira, eta bi talde horiek Ligaren Europako eremuan daudelako.

Zortzi puntu daude jokatzeke eta Irungo taldeak bederatzi puntuko aldea du bosgarrenarekiko; inolaz ere, Asobal Kopan gertatuko denaren zain egon behar orain, txapeldunak eskuratuko baitu Europarako bosgarren txartela, eta huraxe izango litzateke kontinentean jokatzeko sailkapenik gabeko lehen taldea.

Ia hiru hamarkada pasa dira Bidasoak lau sailkapen kontinental jarraian lotzen ez zituenetik. Orduan, 1993 eta 1997 artean, bidasotarrek EHF Kopa jokatu zuten (egungo European League, non finalerdietan Alziraren aurka galdu zuen); Europako Kopa (1995ean Badel Zagreben aurka txapeldun eta 1996an txapeldunorde Bartzelonaren aurka); desagertutako Errekopa (1997an Fotex Veszprémen aurka txapeldun izan zen, eta 1998an final-zortzirenetan Viking Stavangerren aurka kanporatua), eta 1997an, gaur egun jokatzen ez den Europako Superkopako txapeldunorde ere izan zen.

Datorren denboraldikoa, beraz, klubak historian Europan izan duen hamaseigarren parte hartzea izango da. Egungo bolada oparoa 2019ko irailean hasi zen, azken parte-hartzetik ia 15 urtera, eta ez zioten ez nolanahi ekin, Jacobo Cuetararen taldeak Txapeldunen Liga jokatu baitzuen.

Hurrengo urtean, pandemia bete-betean, Bidasoak berriro lortu zuen Europarako sailkatzea, nahiz eta, kasu hartan, estreinatu berri zen European Leaguen izan, eta Nexe taldeak kanporatu zuen.

Erreskan lortutako Europarako hirugarren txartela aurreko denboraldian izan zen, berriro ere European League-n parte hartzeko. Orduko hartan zuzenean sartu ziren gipuzkoarrak multzoen fasera, hura gainditu, eta joan den apirilean Danimarkako GOG taldeak kanporatu zituen final-zortzirenetan.

LIGA SACYR ASOBAL

RESULTADOS

Ademar León-Bada Huesca37-37

Antequera-Helvetia Anaitasuna22-34

Barça-Morrazo Cangas35-19

Bidasoa Irun-Granollers29-27

Cuenca-Puente Genil37-30

Herol Nava-Torrelavega26-26

Logroño La Rioja-Valladolid32-29

Unicaja Sinfín-Benidorm23-25

CLASIFICACIÓN

PRÓXIMA JORNADA

Torrelavega-Bidasoa Sábado, 17.00