Bilbao-Bizkaia sustatzeko kanpaina aurkeztuko du Aldundiak Europan

Turistak erakartzeko helburu duen kanpaina berri bat abiarazi egin du Bizkaiko Foru Aldundiak Amsterdam, Bartzelona, Milan eta Parisen. Xede nagusia Bilbao-Bizkaia ekimena sustatzea da, batik bat.

Kanpaina horrek publizitate konbentzionala gainditzen duen esperientzia sortzeko asmoa du, sormen inguratzaile eta deigarriekin, hiri horietako pertsonak sorpresaz eta jakin-minez erreakzionatzera gonbidatzen dutenak. Kanpaina honen helburua, urte honetarako ezarritako sustapen-estrategiaren parte moduan hainbat aldagairen arabera interesgarrientzat jotzen diren merkatuak hautatu ondoren, hiri eta herrialde horietako turistak gure destinora erakartzea da. Aldagai horien artean daude, besteak beste, merkatu horiek izan duten hazkundea, gure lurraldearekin duten konektibitatea, edo turistek hemen egon diren bitartean izan duten gastu-maila.

Horrela Parisek maila tradizionalean Bilbao Bizkaiari turista-bolumen handiena eman dion atzerriko merkatua ordezkatzen du, eta, halaber, 2022an sarrera-kopuruan hazkunde handiena izan duenetako bat da. Amsterdam eta Herbehereak, oro har, lehentasunezko merkatutzat jotzen dira azken urteotan bertatik iristen diren turisten kopuruak etengabe gora egin duelako; horrek, Bilbao Bizkaiarekiko konektibitate onarekin batera, etorkizunean hazteko aukera handia ematen du. Milanek, halaber, konektibitate ona du eta merkatu interesgarria da italiar turistek egiten duten gastu-mailagatik. Bartzelonarekin ere gauza bera gertatzen da, Estatuko hirugarren merkatua da turista-kopuruari dagokionez, eta lehena gure lurraldean egiten duten egonaldian egiten duten gastuari dagokionez.

Kanpaina multzo moduan asmatu eta pentsatu bada ere, hiri horietako bakoitzean erabilitako sormena egokitu egin da, bai kokatuta dauden espazioetara, bai merkatu horietako turisten lehentasunetara. Helburua pertsona horiengan erreakzioa eragitea da eta horretarako sormen inguratzaile eta deigarriak erabiltzen ari dira, sustapen-ekimen hau garatzeko aukeratutako lekuetatik igarotzen diren pertsonen arreta bereganatzen dutenak: Paris, Milan eta Bartzelonako metroa eta Amsterdamgo tranbia.

Azken garraiobide horri itsasertzeko inguru batean dagoen traineru baten biniloa jarri zaio erabiltzaileak itsasotik zehar Bilbao Bizkaira ekartzeko. Biniloan gure ohiz kanpoko kostaldeko itsas tradizioak eta itsasargiak daude. Garraiobide hori erabiliko dutenak kanpainaren protagonista bihurtuko dira, kanpotik traineruko edo gure lurraldeko portu bateko tripulazioaren parte gisa ikusiko dituztelako.

Parisko kanpainak 170 metro-geltoki baino gehiago 10 euskal objektu tradizionalez osatutako galeria bihurtzen ditu (eguzki-lorea, txapela, abarka, xistera, makila...); objektu hauek diseinu-bilduma esklusibo bat balitz bezala erakusten dute Bilbao Bizkaiaren tradizioa eta nortasuna. Objektu horietako bakoitzarekin batera bere historiari eta inguruko bitxikeriei buruzko azalpen laburra ematen da.

Milango metroaren Porta Genovako geltokian kanpainak zuzenean interpelatzen ditu garraio-modu horren erabiltzaileak eta mendi eta itsaso harrigarrien edo Bilbao Bizkaian aurki dezaketen hiri eta metropoli sutsuaren alde egitera gonbidatzen ditu. Kanpainaren atal honen leloa "Tu eliges tu destino Bilbao Bizkaia-Zeuk aukeratzen duzu zure Bilbao Bizkaia destinoa " da eta hainbat nasatan geltokian barrena egiten diren bi ibilbideren bidez Bizkaia naturala eta Bilbo kulturala eta diseinuzkoa aurkezten ditu; ibilbide horien artean pertsonek euren lehentasunen arabera aukera dezakete.

Azkenik Bartzelonan lerro informalagoa eta umoretsuagoa aukeratu da Bilbao Bizkaia Diagonaleko aldagunean sustatzeko, kasu honetan hyperbannerren 70 metro linealekin. Hiperbaner horietan ikusleekin jolasten da euskarazko "tx" fonema erabiliz eta bizkaitarren leku eta ohiturei buruzko mezuak emanez.