Bilbobusek, Bilboko Udalaren Mugikortasun eta Jasangarritasun Sailak sustatuta, 'Bilbobus ikasgelan' proiektua jarri du martxan, autobusa erabilera sustatzeko eta bultzatzeko.
Zenbait ikastetxetako ikasleek hartu dute parte ekimenean, 2021-2022 ikasturtean zehar, ikasleek autobusen erabilera- eta segurtasun-arauak ezagutzeko, autobusa ohiko garraiobide bezala erabiltzen ohitzeko eta uriko toki desberdinetara autobusez joaten ikasteko, besteak beste.
«Helburua da gazteei garraioa hurbildu eta ezagutaraztea, eta, aldi berean, garraio hori erabiltzeko autonomia handiagoa ematea. Gure asmoa da gazte-gaztetatik ikustea garraio publikoa urian zehar ibiltzeko aukera jasangarri gisa», azaldu du Nora Abete Bilboko Udaleko Mugikortasun eta Jasangarritasun Saileko zinegotziak.
«Bilbobus ikasgelan» Bilboko ikastetxeetako eta heziketa bereziko zentroetako 6-12 urte bitarteko umeei zuzenduta dago.
Jolasen, bideoen eta multimedia materialaren bitartez, ikasleek Bilbobusen historia ezagutu dute hurbiletik, hastapenetatik gure egunetara arte. Horrez gain, ibilgailuen, ibilbideen, loturen eta ordutegien berri jaso dute, uriko auzoak eta interes-puntuak lotu ahal izateko. Gainera, bidaiatzeko eta Bilbobus modu egokian erabiltzeko arauak ikasi dituzte.
Bestalde, Bilbobusen garajea bisitatu dute, eta autobusek zerbitzu ematera irteteko han ematen diren prozesu eta jardueren berri jaso dute. Azkenik, egindako jarduerekin lotutako opariak banatu dizkiete, gelan jarraitzen ikasi ahal izateko.
BALORAZIO OSO POSITIBOA
Ekimena oso positiboki baloratu dute. Ikasle eta irakasleek esan dute proiektua «oso erabilgarria» dela «ikasleen egunerokorako», eta garajera egindako bisita eta zerbitzua kudeatzeko laguntza-sistema izan dira programan hoberen baloratutakoetako batzuk.