Larunbat honetan, urriak 1, arratsaldeko 19.00etatik aurrera, Euskalduna Jauregiak Bilboko Udal Musika Bandaren kontzertua jasoko du. Bandak Carl Orffen "Carmina Burana" interpretatuko du.
Sarrerak jauregiko leihatiletan, Euskalduna Jauregiaren webgunean eta Kutxabank kutxazainetan eros daitezke.
José Rafael Pascual-Vilaplana maisuak gidatuko duen Bilboko Udal Musika Bandak, Olatz Saitua sopranoa, Carlos Mena kontratenorra, Toni Marsol baritonoa eta Igor Ijurrak zuzendutako Iruñeko Orfeoia izango ditu lagun.
Iruñeko Orfeoia Europako abesbatza talde beteranoenetako eta entzutetsuenetako bat da. Azken hamar urteotan munduko hitzordu eta auditorio garrantzitsuenetakoetan parte hartu du, hala nola Carnegie Hall, Lincoln Center, Théâtre des Champs Elysées, BBC Proms edo San Petersburgoko Gau Zurien Jaialdian.
“Carmina Burana” XX. mendeko musika-errepertorioko lanik ezagunenetako bat da, eta garai guztietako arrakastatsuenetako bat. Frankfurten estreinatu zen 1937an eta 85 urte geroago mundu osoko areto eta auditorioetan entzungai izaten jarraitzen du. Carl Orff alemaniarrak 1935 eta 1936 artean konposatutako XX. mendeko kantata eszeniko indartsu honek Carmina Buranan bildutako Erdi Aroko olerki goliardeskoen aukeraketa bat erabiltzen du testu gisa, Alemaniako Benediktbeuern hirian aurkitutako eskuizkribu batean bildutako XII. eta XIII. mendeetako bilduma. Obra, ikusentzuleentzako gustukoenetariko bat bihurtu da, eta orkestra eta banda profesionalek mundu osoan gehien interpretatzen duten musika-lan klasikoetako bat.
Bilboko Udal Musika Bandaren hurrengo kontzertua urriaren 23an izango da, "Egunsentiaren zurrumurrua" izenburupean. Oraingoan, Iker Sánchez BilbaoSinfonietta Orkestraren zuzendariak gidatuko du talde bilbotarra, eta zuzendari gonbidatu gisa arituko da. Euskalduna Jauregira bertaratzen diren ikusleek Ferrer Ferran, John Mackey, Philip Sparke, Mark Camphouse eta Thomas Dossen lanak entzuteko aukera izango dute.