Ostiral honetan, irailak 9, arratsaldeko 19.00etatik aurrera, Azkuna Zentroko Kulturen Atrioak kontzertu berezi bat jasoko du. Bilboko Udal Musika Bandak denboraldi berria estreinatuko du bertan 'Isilarazitako oroitzapenak' izeneko ikuskizunarekin, José Rafael Pascual-Vilaplana zuzendari titularraren gidaritzapean. Sarrera doakoa izango da.
Kontzertu honetan Mª José Belenguerren (Onda, Castelló. 1983) izenburu bereko obra estreinatuko da. Bandarako sinfonia bat izango da, musikaren historian zehar ikusezin bihurtu diren hainbat emakume konpositoreri omenaldia egiten diena. Bere lau mugimenduetako bakoitza, nahiz eta obra sinfonikoa kalitatezkoa izan, egungo programazioetan presentzia txikia duen emakume konpositore bati eskainia dago. Emakume konpositoreak honako hauek dira: Henriette Bosmans (Amsterdam, 1895 -1952), Maria de Pablos (Segovia, 1904 – Madril, 1990), Louis Farrenc (Paris, 1804 – 1875) eta Ethel Smyth (Londres, 1858 – 1944).
Gainera, Ida-Rose Esther Gotkovskyren (Calais – Frantzia, 1933), Shelley Hansonen (Washington D.C., 1951) eta Erika Svanoeren (Whitewater - Wisconsin, 1976) obrak interpretatuko dira.
“Musikak eta arteak ezagutza eta gozamena ematen digun askatasunaz kutsatzen gaituzte beti, ideologiez edo sexuez haratago. Kontzertu hau, zailtasunak zailtasun, beren nortasun sortzailea ezjakintasunari aurre egiteko baliabide gisa ematen jarraitu duten emakumeen omenez izango da”, azpimarratu du Pascual-Vilaplana Muroko maisu eta zuzendariak.
Gogoratu behar da Udal Musika Bandak joan den ekainaren 28an aurkeztu zuela 2022-2023 denboraldi berria, “Espazio soinudunak” izenekoa. Horren bidez, oroitzapenekiko lotura sentsoriala izan nahi du, eta, aldi berean, jendeari gehiago ikasteko eta gehiago izaten laguntzeko leku, espazio ezezagun berriak deskubriaraziko dituen bidea. Artea etorkizuneko tresna izan daiteke eta izan behar du. Bere konpainiarekin, programa bakoitzean, entzuleak hunkituko dituzten espazio soinudunak partekatuko dira, esperientzia errepikaezinak bizitzeko aukera emango duten melodiak. Espazio soinudun horiek une musikal paregabeak izango dira, gure arima eta adimenaren elikagai izango direnak.
Lehenengo emanaldi honen ondoren, Bilboko taldea irailaren 23an itzuliko da agertoki berera, "Argi eta iluntasun-espazioak" kontzertuarekin. Oraingo honetan, Mario Ortuño Gelardo zuzendari gonbidatuak zuzenduko du taldea, 2022an Bilbao Musikak antolatutako Orkestra-zuzendaritzako VI. Topaketen irabazleak. Bandak Roque Bañosen "Twilight" eta Johan de Meijen "The Lord of the Rings" obrak joko ditu, besteak beste.