Mugak berriro ere elkartu dira Sahara eta Durangoren artean. Azkenik, bi urte igaro eta gero, 25 ume sahar iritsi dira Durangaldera uda igarotzeko. Ongietorria emateko asmoz, Durangoko Udaleko ordezkariek harrera egin diete haurrei udaletxeko Osoko Bilkuren Aretoan.
Udalaren izenean, Ima Garrastatxu alkateak eta Julian Rios alkateordeak ongietorria eman nahi izan diete, eta Rio de Oro eta Hamadako Izarrak elkarteetako boluntarioen eta familien lana eta konpromisoa eskertu nahi izan dute: "Durangon behar handiena dutenekiko elkartasuna eta lankidetza sustatu nahi dugu, eta, alde horretatik, eredugarriak zarete gu guztiontzat. Aste gutxi batzuetan oxigeno baloi bat emango diegu urte osoan zehar zailtasun handiak dituzten haurrei, Aljeriako basamortuko errefuxiatuen kanpalekuetan bizi duten errealitate gogorra dela eta”.
Abuztuaren amaierara arteko egonaldia aprobetxatuz, haurrei osasun proba eta interbentzioak egingo zaizkie, eta horiek ia ezinezkoa da dagokien errefuxiatu kanpamentuetan egitea. Bisitaren beste arrazoietako bat udako hilabete beroenetan Aljerian jasaten dituzten tenperatura altuak saihestea izango da.
“Saharar herriaren inguruan Espainiako gobernuak izan duen jarrera aldaketaren ondoren, Durangotik saharar herriaren eta herri gisa dituen eskubideen aldeko konpromisoa berretsi nahi izan dugu. Haur horiek bakean bizitzea merezi dute, eta ez miseriazko bizitza errefuxiatuen kanpalekuetan. Horretarako erakunde guztien konpromisoa behar dugu hori horrela izan dadin”, adierazi dute Garrastatxuk eta Riosek.