Eduardo Moreno arabarrak 'Arraigo' diskoa aurkeztu du Gasteizko Musika Bandarekin

Eduardo Moreno konpositore arabarrak Arraigo bere bederatzigarren diskoaren zuzeneko aurkezpena egin du ostiraleanGasteizko Udal Musika Bandarekin batera, Jesus Guridi Musika Kontserbatorioko areto nagusian.

Egileak berak kontzertua aurkezteko agerraldian adierazi duenez, "'Arraigo' gure musika tradizioan oinarritzen den eta gaur egunera eramaten duen konposizio multzoa da, baina, beste ezeren gainetik, zuzenean hunkitzen saiatzen da".

Bestalde, Sonia Diaz de Corcuera Gasteizko Udaleko Kultura zinegotziak gogorarazi du Eduardo Morenok musika banda batean hasi zuela bere ibilbidea eta herri txikietako jaiak ezagutu zituen.

"Han eta hemen trebatu, ikasi eta ikertu zuen, hurbileko eta folklorikoarekiko interesa piztuta, baina baita beste garai, genero, estilo eta lengoaia batzuekiko interesa izanda ere", azaldu du.

Horren guztiaren ondorioz Arraigo diskoa atera duela nabarmendu du, "bere sustraietako musika eta bidean zehar bereganatzen joan den guztia uztartzen dituena".

Orobat, Luis Orduña Gasteizko Udal Musika Bandako zuzendariak aurreratu duenez, "gure musikaren, betiko musikaren, gure folklorearen esentzia jasotzen duten konposizioak dira, Eduardok bere lanari beti ematen dion prisma eta kolorearekin bateratuta. Musika sinplea da funtsean, interpretatzen duenaren nahiz entzuten duenaren arima ukitzen duena".

Eduardo Morenok iazko martxoan grabatu zen 'Arraigo' Gasteizko Felix Petite antzokian, Sonora Estudios estudioekin lankidetzan, eta diskorako berariaz egindako abestiak ditu, hala nola 'Música para un Centenario', mendeurrena zela-eta Gasteizko Txistularien Bandak egindako enkargua.

Izan ere, Diaz de Corcuerak nabarmendu duenez, musikari arabarra "hori baino askoz gehiago da, eta adjektibo askorekin defini daiteke: konpositorea, zuzendaria, interpretatzailea, ikertzailea, idazlea".

Orduñak beste kalifikatzaile bat ere aipatu du: "Eduardo Moreno, zalantzarik gabe, erreferentea da Arabako bandarako musika konpositore gisa".

"Azken urteotan, Gasteizko Udal Bandan, haren hainbat lan estreinatzeko ohorea eta plazera izan ditugu, eta gure lankidetza are urrunago eramateko gogo handia genuen. Hain zuzen ere, disko honek aurreikuspen horiek guztiak bete ditu", gaineratu du.