Eibarrek ez du ezustekorik nahi Ipuruan

Eibarrek ez du Ipuruan ezustekorik nahi, goranzko bidea topatu nahian etorriko den Eivissa azken sailkatuaren aurka (21.00etan). PUtzutik irten asmoz aurkaria indartu denaren jakitun dira armaginak, eta gauzak zail jarri nahiko dizkiete denboraldi honetan gipuzkoarrek porrotik izan ez duten estadioan.

Gaizka Garitano entrenatzaileak ezingo du Correa erabili, txartelengatik zigortuta dagoelako, ezta Blanco Leschuk ere, aste batzuetarako baja izango baita; Vadilloren parte-har-tzea zalantzan izango da, lesio txiki bat duelako. Aitzitik, entrenatzaileak hala nahi izanez gero, neguko lehen fitxaketa jokatzeko moduan izango du, Juan Carlos Arana aurrelari kanariarra, alegia.

Uharteko taldeak, berriz, bigarren itzuliaren hasiera honetan puntuak hirunaka batzen hasi beharko du putzutik ateratzekotan, hamasei puntu besterik ez baititu.

Urdin-argiak jokalari berriekin etorriko dira aukera berri honi aurre egitera; lau fitxaketa egin dituzte, bakar bat ere ez Bigarren Mailakoa, Joseda Menargues eskuin atzelaria, Marcos Mauro eta Fausto Grillo erdiko atzelari argentinarrak, eta Alex Aizpuru –Kaxe– aurrelari azpeitiarra. Lehen itzuli osoan zehar defentsan egindako hutsegiteak saihestu behar dituztela jakinda egingo dio aurre Lucas Alcaraz entrenatzaileak 2023ko lehen partida horri, oso talde ahula izan baitira orain arte, gol aukera asko eskainiz.

Eibarrek eta Eivissak hiru partida ofizial jokatu dituzte aurrez aurre, armaginek bi garaipen eskuratuz eta Eivissakoek bestea. Denboraldi honetako lehen itzulian talde euskaldunak 1-2 irabazi zuen.