Ekonomia Berreskuratzeko eta Eraldatzeko Proiektu Estrategikoal martxan

Euskal Autonomia Erkidegoak (EAE) 3.474 milioi euro jaso ditu Berreskurapenerako eta Erresilientziarako Mekanismoaren Europar Funtsetatik 2024ko abenduaren 31ra bitartean.

Hala zehaztu du astelehen honetan Eusko Legebiltzarrean Mikel Torres Eusko Jaurlaritzako bigarren lehendakariorde eta Ekonomia, Lan eta Enplegu sailburuak, Iñaki Ruiz Ekonomia sailburuordearekin batera, berak eskatuta egindako agerraldian.

Torresek xehatu duenez, jasotako 3.474 milioi euroetatik 1.301 milioi Espainiako Estatuak esleitu eta autonomia erkidegoak kudeatuak dira, eta 1.922 milioi Estatuak berak kudeatuak (183 milioi maileguetan eta 135 milioi bermeetan).

Gainera, beste 252 milioi euro kudeaketa autonomikokoak dira, euskal enpresek beste erkidego batzuetan irabazitako diru laguntza eta lizitazioenak. Guztira, beraz, 3.474 milioi euro lortu dira EAErako.

Laguntzen bolumen osotik, onuradunen %47 mikroenpresak eta enpresa txiki eta ertainak (ETE) izan dira, eta %28 enpresa handiak (%42 aldi baterako enpresa batasunak gehituz gero. Gainera, onuradunen %9 fundazioak izan dira, eta %4 familiak.

Torresek gogoratu du batzuetan zaila dela esleipen irizpideak aplikatzea, eta zenbait proiektutan ez dela berariaz agertzen lurraldetasunaren ehunekoa, batez ere, Estatuaren kudeaketakoetan, ez baitute diskriminaziorik egiten lurralde historikoaren arabera, autonomia erkidegoen arabera baizik. Horregatik, ez da erraza inpaktua lurraldearen arabera zehaztea.

Horren adibide da Mercedesen kasua. Bere egoitza soziala Madrilen dago, baina Europako funtsen eragina Araban sortzen da, han baitu ibilgailuak fabrikatzeko lantegi nagusia.

Lizitatutako funtsetako 3.474 milioi euroetatik, ebazteko dauden deialdietatik eta funtsen kudeaketa gastuetatik, funtsetako 3.291 milioi euro esleitu zaizkie jada azken 22.901 onuradunei.

Lurraldeka, Arabari %12 esleitu zaio (388.760.837 euro), Bizkaiari %31 ((1.029.774.968 euro) eta Gipuzkoari %24 (797.604.199 euro). Gainera, beste probintzia batzuetatik -Mercedesen kasuan bezala-, 1.074.495.000 euroko inpaktua izan dute EAEn, hau da, %33koa.

KUDEAKETA GAITASUNA

Torres "harro" agertu da kudeatzeko gaitasunarekin eta gauzatze mailarekin, "Euskadi Estatuko Berreskuratze eta Erresilientzia Mekanismoaren funtsak egikaritzeko tasa handiena duten hiru autonomia erkidegoen artean baitago, %76ko tasarekin, Estatuko batez bestekoa %62koa denean".

Halaber, Ekonomia Berreskuratzeko eta Eraldatzeko Proiektu Estrategikoek urtarrilean izan duten bilakaera nabarmendu du, ibilgailu elektrikoaren eta konektatuaren balio katea bultzatzeko proiektuetarako laguntzen deialdia ebatzi baita.