Euskaraldia, hamabost egunez hizkuntza ohiturak astinduz

Ahobizi eta belarriprest txapak nonahi ikusi daitezke jadanik Euskal Herriko kaleetan. Euskaraldia gaur abiatu da, eta horrekin batera hizkuntza ohiturak astintzeko ariketa ere. Abenduaren 2ra arte hirugarren edizioa ospatuko da, euskara ikusarazi, hauspotu eta hitzez ekiteko garaia abiatuko duen ariketa masiboa bi urteren ostean plazaratuz.

Gaurtik eta euskararen egunera arte, Eusko Legebiltzarrean ere ahobizi eta belarriprest ugari izango dira, euskaraz hitz egitea “are ohikoagoa izan dadin eta hizkuntza hori erabiltzeko aukera gehiago sor daitezen”, ohar batean azaldu dutenez. Horretarako, Euskaraldiak irauten duen bi asteetan jarduerak antolatu dituzte, Legebiltzarrekoen eta Arartekoaren parte hartzearekin.

Legebiltzarreko Mahaiak Euskaraldiarekin bat egitea erabaki zuen maiatzaren 24ko bileran. Organo horrek ekimena babestu eta sustatzea erabaki zuen, baita atxikimendu publikoa adieraztea eta Legebiltzarrean bertan ‘ariguneak’ sortzea ere. Ordezkari politiko eta instituzionalak bertan direla, eta euskara esparru guztietan erabiltzeko deia egin dute, euskara entzuteko eta hitz egiteko prestasuna agerian utziz.

Talde guztietako parlamentariek, Vox izan ezik, Bakartxo Tejeria Ganberako presidentea buru dutela, ekimen honen hasieran parte hartu dute, eta horietako bakoitzak aukeratu du gaur eta abenduaren 2a bitartean euskara bultzatzeko hartuko duten rola.

Bingen Zupiria Eusko Jaurlaritzako bozeramaile eta Kultura sailburuak bere aldetik, “Belarri prest” txapa jarri du, aurreko urteetan bezala. Txapa horren bidez, euskaraz hitz egitera gonbidatzen ditu solaskideak. Zupiriak nabarmendu duenez, Euskaraldia “Hitzez ekiteko garaia” lelopean egiten da aurten, eta gizartearen eta erakunde publiko eta pribatuen arteko “lankidetzaren adibide” da. “Ahalegina egin behar da gehienetan euskaraz hitz egiteko”, azaldu du bozeramaileak.

Eraginean azpimarra

Hurrengo hamabost egunetan Euskaraldiak euskara erabiltzera eta asmo horretan jauzi kualitatibo bat ematera gonbidatzen du, 2020an pandemia eragin zuen hainbat erakunderen parte-hartze jaitsieraren ondoren.

Ildo horretan, aukeratutako leloaren bidez, hitza eta ekintza uztartzeko beharra azpimarratzen da, hizkuntza-ohituren aldaketan urrats berri bat emateko. EAJren talde parlamentarioak ekimena babestu du berriro, eta ohar baten bidez azpimarratu du “euskarak konpromiso pertsonal eta kolektiboa” behar duela “indartzeko, zabaltzeko eta bultzatzeko”. Hori dela eta, “Euskaraldiak irauten duen bi asteetatik aurrera hizkuntza-ohiturei eusteko aurrerapausoa” eman behar dela defendatu du.

Aurtengo Euskaraldiaren leloa, ‘Hitzez ekiteko garaia da’, bere eginez, Jaurlaritzak ‘txio’ lehiaketa bat jarriko du abian. Era berean, bi zuhaitz jarriko dira Legebiltzarreko sarrera nagusian, nahi dutenek bertan zintzilika ditzaten Euskaraldiarekin lotutako hitzak, gogoetak edo sentsazioak. Azkenik, azaroaren 29an ‘Kafedromo’ bat egingo da Ganberako kafetegian ekimenaren inguruko esperientziak eta balorazioak partekatzeko. Gainera, ‘txio’ lehiaketako sariak banatuko dira.