Emakumeek historian izan duten egitekoa balioesteko sorkuntza eszenikoko tailerra antolatu du Bilboko Udalak

BilbaoEszena Bilboko Udalaren antzerki baliabideen zentroak 'Historikas' sorkuntza eszenikoko tailerra antolatu du martxotik ekainera, Nuria Moran Crespo diziplina anitzeko sorkuntzan espezializatutako artistaren eskutik, emakumeek historian izan duten egitekoa berreskuratzeko eta balioesteko, "emakumezko figura askok ez baitute behar bezalako aintzatespenik izan".

"Lan zientifikoak, artistikoak, literarioak edo bestelakoak egin zituzten emakumeak, bizi izan ziren garaian funtsezko eragina izan zutenak, baina eskola liburuetan agertzen ez direnak", adierazi dute Bilboko Udcaletik.

Bada, "ahaztutako emakume horien zeregina berriz adierazteko", tailerrak 5 eta 15 minutu bitarteko pieza eszeniko txikiak sortzea proposatuko du, eta ikasleek antzeztuko dituzte, prestakuntzan aurreikusitako jarduerak osatu ondoren.

Zehazkiago, tailerrak hiru fase ditu. Lehenengoan, ikerketa plastikoko hainbat tresna landuko dira parte hartzaileak aukeratutako pertsona historikoaren nortasunarekin eta ibilbidearekin ohitzeko, eta aukeratutako emakumearen historiaren proposamenak, jarduerak eta edukiak aurkeztuko dira.

Bigarren fasean, omenaldi eszenikoa bera osatuko da, elementu dramaturgikoen, ikus-entzunezkoen eta bestelako teknika eszenikoen bidez. Azkenik, ikasleek antzezlanaren sorkuntzari eta eszenaratzeari helduko diote. Eszenaratzea "erritual bat" izatea da helburua, "ikusleak antzezpen bati baino gehiago omenaldi bati laguntzeko".

Tailerrak 12 saio izango ditu, bina ordukoak (19:00-21:00), eta martxoaren 6, 13, 20 eta 27an, apirilaren 3an eta 10ean, maiatzaren 8, 15, 22 eta 29an, eta ekainaren 5ean eta 12an egingo da. Ekainaren 20an beste saio bat egingo da ikasleek lantegian sortutako pieza taularatzeko. Ikastaroa Basurtuko Udaltegian izango da.

Tailerra adin nagusiko emakumeei zuzenduta dago, arte eszenikoekin lotuta egon ala ez, baldin eta historian ahaztutako emakumeei ahotsa eman nahi badiete, pieza-omenaldi bat sortuz. Gehienez ere hamar ikasle egongo dira.

Prezioa 75 euro da (60 euro Bilbao Eszenako, ADDEko, EABko eta Artekaleko bazkideentzat), eta izena emateko epea martxoaren 4ra arte dago zabalik, kultura@bilbao.eus helbide elektronikora eskatuta emango den inprimaki bat betez. Hautatutako ikasleei posta elektronikoz jakinaraziko zaie martxoaren 5ean, eta, une horretan, matrikulazioa formalizatzeko eta ordainketa egiteko eman beharreko urratsen berri ere emango zaie.

Nuria Moran Crespo artista eta sortzailea da eta 35 urteko ibilbidea du arte eszenikoen sektorean. Mama Crea konpainiaren sortzailea da eta diziplina anitzeko sorkuntzan espezializatuta dago.