Eskola kirolik gabe

Eskola-kirola bertan behera geratu da; gurasoen elkarteek onartu ez duten erabakia da

Eskola-kirola bertan behera geratu da berriro. Aste honetan, Eusko Jaurlaritzak debekatu egin du eskola-kirolaren lehiaketa, eta gazteek entrenatu baino ezingo dute egin, baina ez jokatu. Ez da egoera berria; izan ere, iaz koronabirusaren kutsatzeen gorakadaren ondoren ere neurri hori hartu zen. Hala ere, ikasturte honen hasieran eskola-kirola berriro lehiatu zen, nahiz eta Aldundiak bi egun bertan behera utzi zituen elurragatik. Egoera ezberdin hauek gazteen artean lehiaketak urriak izatea eragin du. Hori dela eta, Denon Eskolak, Arabako Gurasoen Elkarteen Federazioak, negatiboki baloratzen duen erabakia izan da.

Beraz, momentuz, lehiaketa debekatuta dago Euskadin koronabirus kasuak jaitsi arte: "Gaur egun, covid-19aren transmisio komunitarioa oso altua da Euskal Autonomia Erkidegoan. Osasun Saileko Osasun Publikoaren eta Adikzioen Zuzendaritzak informazioa emango du izateari uzten dionean", azaldu zuten Eusko Jaurlaritzatik. Gainera, neurri horrekin batera, derrigorrezkoa da patioan maskara erabiltzea, eta debekatuta dago talde desberdinak elkartzea ere. Era berean, eskolaz kanpoko jarduerek ere izango dute eragina.

Izan ere, intzidentzia altuko edo oso altuko egoeran, ez dira "burbuila" desberdinetako ikasleak nahastuko. Eta intzidentzia altuko edo oso altuko egoeran, ezin izango dira horrelako ekitaldiak antolatu ikastetxearen barruan. "Pandemiaren hasieran haurrei egozten zitzaien transmisioaren errua; horregatik, itxi zen lehen gauza ikastetxeak izan ziren, haurrak zirelako gainerako herritarrak kutsa zitzaketen arriskutsuenak. Tamalez, haiengan jarri zuten arreta, larregi, nire ustez. Orain, berriz, ez diegu antigeno-testik egingo ikasgelan positiboren bat izanez gero. Ulertzen ez ditudan neurriak iruditzen zaizkit", salatu du Lourdes Errasti Denon Eskolako presidenteak egunkari honetan.