ETS taldeak entsegu ireki bat eskainiko du Errenterian

ETS musika taldea bere hurrengo ikuskizuna prestatzen ari da egunotan eta, datorren astean, Errenteriako Lekuona Fabrikan izango da sorkuntza lanetan.

Horiek horrela, ostegunean, otsailaren 20an, herritarrek ere izango dute taldearen lana gertutik ezagutu eta euren lansaio bat zuzenean ikusteko aukera. 17.45ean izango da hitzordua eta ordubeteko iraupena izango du gutxi gorabehera.

Gonbidapenak

Esperientzia hau bizitzeko interesa duten pertsonek formulario bidez eman beharko dute izena. Norberak behin bakarrik eman ahal izango du izena, eta horretarako epea hilaren 13an bukatuko da, 23.59ean.

Jasotako eskaera guztien artean, zozketa egingo da otsailaren 14an eta hilaren 17an jakinaraziko zaie irabazleei e-postaz.

150 ikus-entzule

Irabazle bakoitzak bi sarrera eskuratuko ditu eta guztira 150 izango dira banatuko direnak.

Bestalde, 2011tik aurrera jaiotako gazteek heldu batekin joan beharko dute eta bakoitzak bere sarrera beharko du.

Arabarrak

En Tol Sarmiento, ETS, Ekoran (Arabako Errioxa) sortu zen 2005ean. 2008an, taldeak berak ekoitzi zuen Vendimia Seleccionada, sei abestiz osatutako maketa-diskoa kaleratu zuen. 2012. urtean taldeak Hacia la luna lan berria kaleratu zuen 13 abestirekin.

Arrakasta

2014an Zure Mundua diskoa atera zuen eta hurrengo urtean Beldurrik ez. Bi disko hauekin Euskal Herri mailan ezagun bihurtu zen taldea eta kontzertu ugari eman zituen.

2017ko azaroaren 28an, ETS taldeak Ametsetan diskoa atera zuen. Izan ere, bere jarraitzaile leialei eskerrak eman nahi zieten, 11 urtez eman zieten laguntasunarengatik.

2019. urtean estudioko bosgarren diskoa atera zuen En Tol Sarmientok. Aukera berriak izenarekin.

2022an seigarren diskoa plazaratu zuela iragarri zuen taldeak, Guretzat izendatua.