Okinen eta gozogileen sektoreak ez du unerik onena pasatzen. Salmentek behera egiten jarraitzen dute, eta, horregatik, sektore horretan Araban, Gipuzkoan eta Bizkaian dauden hainbat elkarte elkartu egin dira sektore horren alde borrokatzeko eta aldarrikatzeko. Kalitate handiko produktu eta elikagaien alde lan egiten dutela diote. Eusko Jaurlaritzak bat egin du aldarrikapen horiekin eta sektore horren aldeko apustuarekin.
Hala, eta ildo beretik jarraituz, Araba, Bizkaia eta Gipuzkoako okindegi eta gozotegi tradizionalen elkarteek elkarrekin azaldu dute Euskadin sektorea bizitzen ari den egoera, azken urteetan egiturazko arazoak jasaten ari baita salmentak eta fakturazioa murrizteagatik; hain zuzen, arrazoi horrengatik establezimendu tradizional batzuk itxi egin dira. Sei elkarteekin batera, Nekazaritza, Arrantza eta Elikagaien Politikako sailburuorde Bittor Orozek Ekonomiaren Garapen, Jasangarritasun eta Ingurumen Sailak elikaduraren euskal balio-kate osoarekin duen konpromisoa erakutsi nahi izan du, katearen lehiakortasuna bultzatzeko. Hori dela eta, Eusko Jaurlaritza Okintza eta gozogintza artisaua, bihotzez egina leloa duen kanpaina bultzatzen ari da, sektore hori balioan jartzeko asmoz. “Okin eta gozogile tradizionalek produktuak mimo handiz egiten dituzte eta kalitatezko produktuak ekoizten dituzten maisuak dira”, adierazi du Oroz sailburuordeak.
"Azken hamarkadan ogiaren kontsumoa % 12 murriztu da. Duela hamar urte, batez beste, urtean 42 kilo ogi per capita inguru kontsumitzen zen, eta gaur egun, kontsumo hori pertsonako eta urteko 37 kilogramotik beherakoa da, hau da, % 12 murriztu da azken 10 urteetan. Horretaz gain, kontsumo-ohituretan ere aldaketa batzuk ikusten dira, ogi industrialaren erosketa % 21 hazi baita azken hamarkadan", azaldu dute Eusko Jaurlaritzatik. Kontsumitzaileei okindegi eta gozotegi benetan artisauak identifikatzen laguntzeko, establezimenduen sarreran jarriko den sustapen-bereizgarria sortu da.