Gasteizko 136 taldek eman dute izena Andre Maria Zuriaren jaietan Falerinan jo ahal izateko

Gasteizko Udaleko Kultura Zerbitzua deialdia egin zuen otsailean Andre Maria Zuriaren jaietan Falerina lorategian jo nahi duten hiriko musika taldeentzat, eta orotara 136 bandak eman dute izena.

Helburua da izena eman dutenen artean Andre Maria Zuriaren jaietan Falerinan antolatuko diren kontzertuak aukeratzea eta egun horietan eta beste batzuetan egingo diren emanaldietarako datu base bat osatzea, Gasteizko Udaletik jakinarazi dutenez.

"Eskerrak eman nahi ditut deialdiak jasotako inplikazio eta parte hartzeagatik. Oso pozik gaude harrera bikaina izan duelako eta aurkeztutako taldeek kalitate eta aniztasun handia dutelako", adierazi du Sonia Díaz de Corcuerak, Kultura zinegotziak.

Orain Falerinarako "ahalik eta kartelik onena" osatzeko lan egiteko garaia dela esan du, eta Andre Mari Zuriaren jaietan Gasteizen dagoen tokiko talentuaz gozatzeko aukera izango dela.

Izena eman duten taldeen artean era guztietako musika estilokoak daude, hala nola rock, latino, folk, jazz, rap, soul, trap reggaetoia, house, punk, pop edo indie. Gainera, aurkeztutako taldeen %63k euskarazko abestiak dituzte.

BESTE DATU BATZUK

Taldeen osaerari erreparatuta, gehienak bi eta bost kide artekoak dira, eta zortzi bakarlari ere aurkeztu dira. Gainera, taldeen %45ek emakumezkoak dituzte partaideen artean.

Esperientziari dagokionez, taldeen %16k azken bost urteotan bost kontzertu baino gutxiago egin dituzte, eta beste muturrean dago 100 toki baino gehiagotan jo duten taldeen %8a.

Hemendik aurrera, Gasteizko Udaleko Kultura Zerbitzuak jasotako datuak erabiliko ditu kalitatezkoa, anitza eta espazio eta egun horietara egokitutako kartela eskaintzeko.

Udala bera jarriko da harremanetan aukeratutako taldeekin Andre Maria Zuriaren jaietan Falerina lorategian joko duten taldeen egitaraua antolatzeko, eta Aste Santuaren aurretik emango dute behin betiko kartelaren berri.

Gainera, deialdiaren bidez osatu duten datu basea kontuan hartuko da hurrengo Andre Maria Zuriaren jaietarako eta Kultura Zerbitzuak antolatutako beste programa batzuetarako.