Gasteizko Nazioarteko Parabadminton Txapelketaren laugarren edizioa jokatuko da martxoaren 4tik 9ra Aranalde kiroldegian, eta 30 herrialdetatik iritsitako 210 kirolari eta 75 teknikari bilduko ditu.
Txapelketa Just Badminton klubak antolatu du
Txapelketa Just Badminton klubak antolatu du, Gasteizko Udalaren, Arabako Foru Aldundiaren, Eusko Jaurlaritzaren eta Vital Fundazioaren laguntzarekin.
Dina Abouzeid txapelketaren zuzendariarekin batera, Ana Lopez de Uralde Gasteizko Kirol zinegotziak, Juanjo Rojo Arabako Kirolerako foru zuzendariak, Arantxa Ibañez de Opacua Vital Fundazioko zuzendariak eta Andoni Azurmendi Badmintoneko Espainiako Federazioko presidenteak parte hartu dute astearte honetan lehiaketaren aurkezpenean.
Txapelketaren laugarren edizioan munduko onenak lehiatuko dira sei mailatan banatuta
Bada, nabarmendu dutenez, txapelketaren laugarren edizioan munduko onenak lehiatuko dira sei mailatan banatuta. Horien artean izango dira Espainiako Estatuko hamar jokalari onenak, etorkizun oparoa duten kirolariak eta Joko Paralinpikoetan eta Europako eta Munduko txapelketetan lehiatu diren jokalariak.
Gasteizko lehiaketa 2026ko Munduko Txapelketako salkapenerako puntuagarria izango da
Gasteizko lehiaketa 2026ko Munduko Txapelketako salkapenerako puntuagarria izango da, eta egunero 09:00etatik 20:00ak bitarte jokatuko da. Finalerdiak martxoaren 8an izango dira, eta finalak martxoaren 9an. Aurreko edizioetan bezala, zuzenean jarraitu ahal izango da Espainiako Badminton Federazioaren YouTube kanalean.