Gasteizko tranbiaren Betoñuko garajea eraikitzeko proiektua lizitatu du ETSk 800.000 euroan

Eusko Jaurlaritzako Mugikortasun Jasangarriaren Sailak Gasteizko tranbiaren Betoñuko garajea eta bere konexio adarra eraikitzeko proiektua lizitatu du, ETS Euskal Trenbide Sarearen kontratazio batzordearen bitartez, 800.000 euroren truke eta 12 hilabeteko epearekin. Salburuako linearen luzapen horrek beste geltoki bat aurreikusten du Deba Arroa kalean.

ETSko iturriek jakinarazi dutenez, Zabalganako tranbiaren luzapena jarri behar da martxan aurki (Lovainatik auzo horretara bitarteko eraikuntza proiektua oso aurreratuta dago), eta ikusi da egungo garajea eta tailerrak hartzen dituzten Ibaiondoko instalazioak ez direla nahikoak gaueko aparkaleku eta mantentze lanetako beharrei erantzuteko.

Horregatik, kokaleku izateko hainbat aukera aztertu ziren, eta udal administrazioak eskatuta Betoñun jartzea erabaki zenn. Betoñun garaje berria eraiki ondoren, Ibaiondo berritu egin beharko da berrikuspenetarako trenbideak handitzeko, eta, horrela, bere funtzio nagusia tailerra izango da.

Euskotrenek egindako zenbatespenen arabera, Gasteizko tranbia sarea osorik garatzeko 28 tren beharko dira. Kontuan izanda tranbia Zabalganara luzatzean 18 unitatek gaua Betoñun egingo dutela eta erreserbako lau plaza utziko direla, ETSk garaje diseinua egitea erabaki du, 45 metro luze diren 22 tranbiarentzako gutxieneko edukierarekin.

Garajera sartzeko adarra, berriz, Salburuko geltokian konektatuko da, trazadurak Martxoaren 8a etorbideko erdibitzailetik jarraituko baitu, Londres etorbidearekiko bidegurutzeraino. Han, ibilbideak zuzen jarraituko du, eta, ondoren, Helsinki kaletik Deba Arroa kaleraino biratuko du; toki horretan beste geraleku bat egongo da.

Ondoren, etorkizuneko garajearen partzelarako sarbidea Hezeguneak pasealekuaren eta Elgoibar kalearen arteko biribilgunetik egingo da.

Diseinua 226 metro luze eta 108 metro zabal den lursail ia angeluzuzenean ezarriko da, bi eraikin independenterekin, tranbietarako bi sarbiderekin eta bi aparkaleku dituzten 11 trenbiderekin -horietako batean beheko eta goiko sarbidea dituen trenbide bat barne-. Kanpoko aparkalekuak ere erreserbatu egingo dira.

Eraikinaren estalkia erraz iristeko modukoa izango da, mantentze lanak egiteko, eta plaka fotovoltaikoen instalazioa ere izan beharko du.

Albo batean, garbiketarako kanpoko eraikina, balaztetarako agregakinen kargagunea eta gurpil neurgailua egongo dira. Era berean, bi gune erantsi ezarri dira, eta horietan egongo dira, besteak beste, barne zerbitzuak, hau da, aldagelak, komunak eta gidarientzako atsedenlekua, biltegiak, gela teknikoak, bilera gelak, prestakuntza gelak, bulegoak eta aginte gunea.