Gasteizko Udalak 100.000 euro banatuko ditu ekonomia zirkularra indartzeko laguntzetan, iaz baino 10.000 euro gehiago

Gasteizko Udaleko gobernu bilerak ekonomia zirkularreko proiektuak garatzeko bi laguntza lerro eta hiru hitzarmen onartu ditu Ekonomia Sustapen, Enplegu, Merkataritza eta Turismo arloan, eta 100.000 euro bideratuko ditu, 2024an baino 10.000 euro gehiago, Maider Etxebarria Gasteizko alkateak prentsaurrekoan iragarri duenez.

Hondakinen sorrera ahalik eta gehien murriztuz produktuen, materialen eta baliabideen balioa ahalik eta denbora luzeenean ekonomian mantentzearen aldeko apustua egiten duten enpresak bultzatzeko laguntzak dira.

Era berean, Vitoria-Gasteiz Laborategi Hiria programaren deialdi berria onartu da, Arabako hiriburua enpresa eta zentro teknologiko eta ikerketakoen eskura jartzean datzan berrikuntzari laguntzeko tresna, garapen teknologikoak ingurune errealetan probatu ahal ditzaten.

Aukeratutako proiektuak bat etorri beharko du ingurumen jasangarritasunaren edo gizarte ekintzaren arloko udal estrategiekin.

Orobat, Gasteizko Udalak hiru lankidetza hitzarmen sinatzea onartu du, Ekonomia Sustapen, Enplegu, Merkataritza eta Turismo Sailaren ekimenez. Lehenengoa Euskal Autonomia Erkidegoko Administrazio Orokorrarekin izenpetuko da, Gasteizen informazio turistiko integraleko zerbitzua emateko, 92.000 eurorekin hornitua.

Bigarren hitzarmena Vitoria-Gasteiz City elkartearekin sinatuko da; hain zuzen, ostiral honetan bertan, 'Wine berria' ekitaldia egingo da, 2025eko uztako lehen ardoa ezagutarazteko eta Arabako Errioxako eta Txakolin ekoizleen lana aitortzeko.

Azkenik, hirugarren hitzarmena Arabako Merkataritza, Industria eta Zerbitzu Ganberarekin izenpetuko da, Visual Sariak garatzeko, Arabako merkataritzaren, turismoaren, ostalaritzaren eta zerbitzuen sektoreko enpresek irudi komertzialari dagokionez egindako lana aintzatesteko asmoz. Gasteizo Udalak 8.000 euro jarriko ditu.