Gasteizko Udalak 4.000 zuhaixka berri landatuko ditu Adurtza auzoan

Actualizado hace 2 minutos

Gasteizko Udaleko Espazio Publikoaren eta Auzoen Sailak Adurtza auzoa berdatzeko proiektua jarri du abian, eta lorez eta kolorez betetako 4.000 zuhaixka landatuko ditu inguruko parterreetan, auzo elkartearen eskaerari erantzunez, landareen barietate handiagoa eskatzen baitzuen, inguruneari bizi eta kolore gehiago emateko.

Gasteizko Udalak jakinarazi du auzoko azpiegitura berdea hobetzea, biodibertsitatea handitzea eta hiri espazioak edertzea dituela helburu jarduera horren bidez.

Gaur egun, Adurtzak zuhaitz helduak eta soropil zabalak dituzten kalitate handiko berdeguneak ditu, baina eremu gehienek ez dute zuhaixka geruzarik, eta horrek mugatu egiten ditu landare aniztasuna eta paisaia aberastasuna. Bada, proiektuarekin, auzoaren estetika hobetzeaz ain, ekosistema indartu eta bizi kalitatea hobetu nahi dira.

Landaketak auzoko kale eta plaza nagusietan egingo dira, besteak beste, Zumakadi pasealekuan, Zumakera plazatxoan, Zumabiden, Martinez de Aragonen, Pablo Xerica kalean, Iturritxun, Mauricio Valdivielso plazatxoan, Errota kalean eta Mendiola bidean. Kolore desberdinetako loraldiak dituzten hainbat espezietako zuhaixkak sartuko dituzte, auzoari urte osoan zehar "paisaia zirraragarriagoa eta erakargarriagoa emateko".

Beatriz Artolazabal Espazio Publikoaren eta Auzoen zinegotziak jardueraren garrantzia nabarmendu du, bai eta ekarriko dituen onura estetikoak eta ingurumenekoak.

"Estetikatik askoz harago" doan esku hartzea dela adierazi du, azpiegitura berdea eraldatu eta indartuko duelako eta onura esanguratsuak dakarzkiolako Adurtzako bizilagunen bizi kalitateari. "Kolorea, poza eta bizitza gehituko ditugu, baina hiriko ekosistema, ingurunea eta ongizatea ere hobetuko ditugu aldi berean", gaineratu du.

Modu honetan, Gasteizko Udalak berretsi egin du "pertsonak eta ingurumena erdigunean jartzen dituen hirigintzarekiko konpromisoa". "Gure hiriak hobetzen jarrai dezake, berdeagoa eta jasangarriagoa izan daiteke", ziurtatu du.

Kontratuak 64.000 euroko inbertsioa eskatuko du eta hiru hilabeteko gauzatze epea aurreikusi du landaketak egiteko; 12 hilabetera arteko mantentze aldi gehigarria ere jasotzen du, landaketen dataren arabera.