Gasteizko Udalak bizikletentzako 1.170 aparkaleku berri sortuko ditu aurten

Gasteizko Udaleko Espazio Publikoaren eta Auzoen Sailak bizikletak aparkatzeko 585 modulu berri instalatuko ditu aurten, bakoitza bi ibilgailurentzako edukierarekin, eta, beraz, 1.170 aparkaleku berri sortuko dira hiri osoko 181 tokitan.

Udal gobernuak mugikortasun jasangarria bultzatzeko eta herritarren artean bizikleta ohiko garraiobide gisa erabiltzeko hartutako konpromisoari erantzuten dio ekimenak, Gasteizko Udaletik jakinarazi dutenez.

Gaur egun, Gasteizek 16.173 aparkaleku ditu bizikletentzat hiri osoan zehar banatuta. Plaza berriak sortu ondoren, 17.343 aparkaleku izango dira guztira, eta horrela, "Arabako hiriburua Europa mailako bizikleta mugikortasunaren erreferentzia izango da".

Aparkaleku modulu berrien instalazioa planifikatzeko orduan, hiriko auzoetan antzemandako beharrak hartu dira kontuan, bai eta eremu jakin batzuetan bizikletentzako azpiegituren gero eta eskaera handiagoa ere.

Ildo horretan, aurten plaza berri gehien izango dituzten auzoak Lakua-Arriaga eta Lakuabizkarra izango dira, baita Arana, Aranbizkarra eta Aranzabela ere. San Martin eta Txagorritxuko plazak ere indartuko dira, baita Salburu eta Arkaiatekoak ere.

Txirrindularientzako aparkalekuak gehitzeko ahalegina Espazio Publikoko Sailak aldez aurretik egindako azterlanaren ondorio da, herritarren eta Kirol Sailaren lankidetzari esker, bizikletak aparkatzeko soluzioak emateko premia handiena dagoen guneak identifikatu baititu.

Beatriz Artolazabal Espazio Publikoko eta Auzoetako zinegotziak adierazi duenez, "gobernu talde honek bizikleta bidezko mugikortasunarekin duen konpromisoa argia eta lehentasunezkoa da".

"Gobernu honen helburuetako bat mugikortasun jasangarria eta osasungarria sustatzea da, eta horretarako gauzak erraztu behar dizkiegu joan etorrietarako bizikleta aukeratzen dutenei. Aparkaleku berri horiek instalatzeak bizikleta garraiobide gisa hartzearen aldeko apustu sendoari erantzuten dio, eta gure hiri berde eta jasangarriaren eredua indartzen du", azaldu du.