Gasteizko Udalak ia 1,9 milioi euro banatuko ditu garapenerako lankidetzako proiektuen laguntzetan

Gasteizko Udaleko gobernu bilerak 2025eko garapenerako lankidetzako proiektuentzako diru laguntzen deialdiaren oinarriak onetsi ditu ostiral honetan, eta guztira 1.890.000 euro banatuko ditu.

Udaletik zehaztu dutenez, Garapenerako Lankidetzaren Zerbitzuak emandako laguntzak bost lerrotan banatuko dira. Horrela, 1,2 milioi euro bideratuko dira 'kateatuak' deitzen zaien proiektuen lerrora (aurten amaituko da eta 2023tik dago abian).

Gainera, 100.000 euro banatuko dira oinarrizko zerbitzuen proiektuak finkatzeko eta diru sarrerak sortuko dituzten proiektuen bideragarritasuna bermatzeko.

70.000 euro gorde dira 2026 eta 2028 artean garatzeko beharrezko laguntza teknikorako eta hiru urteko izaera duten urteko proiektu kateatuen aurrehautaketarako

Era berean, 70.000 euro gorde dira 2026 eta 2028 artean garatzeko beharrezko laguntza teknikorako eta hiru urteko izaera duten urteko proiektu kateatuen aurrehautaketarako.

Urarekin eta saneamenduarekin lotutako bi urteko proiektuak hastea sustatzera 420.000 euro bideratuko dira; zenbateko horretatik, Amvisak 150.000 euroko ekarpena egingo du, eta gainerakoa Garapenerako Lankidetzako Udal Zerbitzuak emango du.

Azkenik, Gasteizko Udalak 90.000 euro bideratuko ditu proiektu txikietara, eta sei hilabeteko aldian garatu beharko dira.

Bestalde, Gasteizko Udaleko Hezkuntza Zerbitzuak Guraso Eskolen XXIX. Topaketa antolatu du larunbaterako, otsailaren 15erako, Europa biltzar jauregian, 'Sare sozialak eta hezkidetza familien esparruan' izenburupean.

Antolakuntzatik adierazi dutenez, gaur egun, sare sozialek zeregin garrantzitsua dute eguneroko bizitzan, eta funtsezkoa da genero berdintasunerako heziketan duten eraginari buruz hausnartzea, batez ere familiaren baitan.

Ildo horretan, larunbateko jardunaldiaren helburua da elkarrizketa irekia eta eraikitzailea sustatzea, sare sozialek ikasteko eta konektatzeko aukerak familia esparruan ere nola eskain ditzaketen jakiteko, sortzen dituzten arriskuak eta erronkak alde batera utzi gabe.

Besteak beste, plataforma digitalek genero roletan duten eragina, estereotipo eta rol tradizionalen indartzea, eduki desegokien eraginpean jartzea, familia harremanetan duten eragina, adikzioa eta mendekotasun digitala, hezkuntza digitalik eza edo amatasun edo aitatasun eredu batzuen gaineko gizartearen presioa jorratuko dira.