Harrera bikaina izan dute Ermuko txarangen jokoek

Koronabirusaren pandemiak eragindako egoera dela eta denbora luzez eten behar izan ondoren, harrera bikaina izan dute Ermuko txarangen jokoek. Aurtengo edizioan herriko bost kadrillak hartuko dute parte. Proba hauek ostegunean hasi ziren, harraren eta jatorrizko bekatuaren probekin, konkretuki.

Atzo, ostirala, bi proba berri izan ziren jokoan: triatloia eta sokatira. Ekintzak arratsaldeko 19:00etan hasi ziren Orbe Kardinala plazan.

Astelehenean, hilaren 18an, leku eta ordu berean, artaburuen eta pepinoen jolasak egingo dira, eta asteartean sokatira finala eta kuboen proba.

Musika eta kirola astebururako

Asteburu honetan Skakeitan talde donostiarrak kontzertua eskainiko du Orbe Kardinala plazan, gaueko 23:30etan, eta bertako Slide banda izango dute aurretik, 22:30ean.

Igandean, egitaraua 09:00etan hasiko da Santixauetako IV. Padel Txapelketaren jarraipenarekin San Pelaioko pistetan. Ordu erdi geroago, benjamin, alebin eta infantil kategoria nazionaleko neska-mutilen txirrindularitza lasterketa hasiko da Anbre industrialdean, Ermuko Txirrindulari Elkartearen eskutik.

10:00etan, Ermua Hiria XXIII. Automodelismo Trofeoa ospatuko da San Pelaio plazan, Eztanda elkarteak antolatuta. Orbe Kardinalaren plazan, berriz, Xake partida azkarren Herriarteko XXV. Txapelketa jokatuko da, Ermutarrak Xake Taldearen eskutik.

Eguna amaitzeko, Eskualdeen Eguna dela eta, herriko kultur etxeek nazioarteko dantza eta musika jaialdia eskainiko dute arratsaldeko zazpietatik aurrera Orbe Kardinala plazan. New Orleanseko Komenka Ethnic Sance & Music Ensemble eta Boliviako Acuarela taldeak igoko dira oholtzara.