Herritartasunerako Eskola Irekiak jardueretan izena emateko epea ireki du

Herritarren Eskola Irekiak atzo ireki zuen denboraldi berriko jardueretan izena emateko epea. Atzo Gasteizko Udalak prentsaurreko batean jakinarazi zuenez, ikasturte berri honetarako programazio zabala diseinatu dute eta hiru hilean behin aurkeztuko dute, aurreko ikasturtean bezala.

Hala, eta ildo horretatik jarraituz, herritarrek atzotik eman dezakete izena programazio berri honetan, Herritarren Partaidetzako eta Gizarte Etxeetako zinegotzi Borja Rodríguezek iragarri zuenez. Hain zuzen, zinegotziak azaldu zuenez, joan den ikasturtean normaltasuna berreskuratu zuten koronabirusaren pandemiaren ondoren, eta ikastaroek presentzialki funtzionatu zuten, herritarren parte-hartze handiarekin. Era berean, ez presentziazko ikastaroak ere egin ziren, online formatuari esker. Bi formatu horien bidez, herritarren parte-hartzea handia izan zen, eta datu horiek ikasturte berri honetan lortzea espero da. “Aurreko ikasturtean, jarduera presentziala berreskuratzeko aukera izan genuen eta 2.084 lagunek hartu zuten parte antolatutako 35 jarduera baino gehiagotan modu presentzialean edo online. Ondorioz, aurreko ikasturtearekin alderatuta, partaideen eta jardueren kopurua handitu egin zen. Eta horri guztiari Youtuben konferentzia nagusiek izandako 1.972 bistaratze baino gehiagok eta Eskolako web-atariak (egindako jarduera ugariak jasotzen dituen liburutegi digitala dago barruan) izandako 6.500 bisita baino gehiago erantsi behar dizkiogu”, adierazi zuen Borja Rodríguezek. “Ikasturte berri honetarako, programazioa diseinatzen eta hiru hilez behin aurkezten jarraituko dugu. Horri esker, malguagoak izango gara eta hobeto egokituko gara hiritarren eskarietara eta gaurkotasunera”, erantsi zuen. Udal-egitaraua Vital Fundazioaren, Radio Vitoria irrati-katearen eta Sareguneren elkarlanari esker bideratzen da Arabako hiriburuko beste eragile batzuen laguntzarekin batera. Gasteizko Udalak jakinarazi zuenez, lehen hiruhilekoko agenda (urritik abendura) hitzaldi batekin hasiko da, Ernesto Moralesen eskutik. Zehazki, bertako kideek azaldu zutenez, urritik abendura bitarteko agenda, lehen hiruhilekokoa, Politika Publikoetan eta Eraldaketa Sozialean doktorea den Ernesto Moralesen El papel de las asociaciones en la participación ciudadana (herritarren partaidetzan elkarteek betetzen duten rola) konferentziarekin hasiko da. Urriaren 6an, ostegunean, izango da, 18:30ean, Europa Biltzar Jauregian. Urriaren 20an, ostegunean, La vida era eso filma egongo da ikusgai Florida zinema-aretoetan 19:00etan. Berdintasuneko, Elkarbizi-tzako eta Dibertsitateko Zerbitzuarekin, Adinekoen eta Garapenean Laguntzeko Lankidetzaren Zerbitzuaren eta Entre 3 zinema-forumaren eskutik eskainiko da. Landatxo Gizarte Etxean egingo dute Udaleko teknikariek eskainitako Nola justifikatu Udalaren dirulaguntzak tailerra. Gasteizko elkarteei zuzenduta dago eta urriaren 25ean, ostegunean, izango da, 16:00etan. Azaroan, aldiz, gizarte-trebeziei buruzko tailerrak egingo dira euskaraz eta gaztelaniaz: El potencial del conflicto (Gatazkaren potentziala) eta Taller online para dinámicas participativas (Dinamika parte-hartzaileetarako onlineko tailerra) izango dira horietako batzuk. Bestalde, Estrella Montolío Bartzelonako Unibertsitateko Gaztelaniako katedradun entzutetsuak El derecho a entender: la comunicación clara, la mejor defensa de la ciudadanía (Ulertzearen eskubidea: komunikazio argia, hiritarren defentsa onena) konferentzia eskainiko du azaroan. Azaroaren 17an, aldiz, zinema itzuliko da Lingui filmarekin. 19:00etan izango da, Florida zinema-aretoetan. “Doakoak dira egitarauko jarduera guztiak. Izen-emateak Internetez egin ahal izango dira Udalaren webgunean, 010 telefono zenbakiaren bidez edo gizarte-etxeetako eta kirol-instalazioetako hiritarren arretarako bulegoetan eta HEIren app-an (hei.eus). Tokiak izen-emate ordenaren arabera esleituko dira”, azpimarratu zuten Gasteizko Udaletik.

Ikasleei zuzendutako proposamenei dagokienez, nabarmendu beharrekoak dira Gasteiz Hiri Hezitzailea Programan jasota dauden HEI Txiki Vitaleko jarduerak. Hiriko ikastetxe guztiei zuzenduta daude eta Vital Fundazioaren laguntzari esker bideratzen dira. Izen-emateak irailaren 9an hasi ziren eta irailaren 29an, ostegunean, amaituko dira. Herritartasunerako Eskola Irekiak, gainera, eskariaren araberako jarduerak biltzen ditu: HEI conoce Vitoria-Gasteiz, adibidez. “Edozein kolektibok edo elkartek Udaleko sail ugarietan egiten duten lana gertu-gertutik ezagutu ahal izateko duten aukera da. Horretarako, hitzordua egiten da teknikariarekin”.