Hondarribiko Udalak Emakumeen Nazioarteko Egunaren kartela aurkeztu du

Hondarribiko Udalak, Emeki elkartearekin batera, 2025eko Emakumeen Nazioarteko Egunaren harira antolatutako ekitaldien iragarkia egiteko kartel irabazlea aurkeztu du. Aurten, Yoana Mintegui Castro artista irundarrak irabazi du lehiaketa, 'Emakume artistak' izeneko lanarekin.

Epaimahaiaren arabera, Mintegui Castroren kartela "originaltasunagatik, berrikuntzagatik eta kalitate artistikoagatik" aukeratu dute. Epaimahaia honako hauek osatu dute: Josu Peña Hondarribiko Gizarte Zerbitzuetako zinegotziak, Emeki Elkarteko Tzane Castillo eta Koro Bidaurretak, eta Judas Arrieta udalerriko artistak. Lehiaketako irabazleak 450 euroko sari ekonomikoa jasoko du bere sormen-lan bikainagatik.

'Emakume artistak' kartelak emakumeek eremu artistikoan duten garrantzia azpimarratzen du, haien talentua eta sormena goraipatuz. Aldi berean, emakumeen ahalduntzea eta ikusgarritasuna sustatzeko mezua ere helarazten du. Lehiaketaren irabazleak adierazi duenez, kartelan ikusten den zortziaren atal bakoitzak Sonia Delaunay, Yayoi Kusama eta Hilma af Klint artisten lanetan du oinarria. Bestalde, Emakumeen Nazioarteko Egunarekin lotura duten koloreak aukeratu ditu digitalki, batez ere mugikorrarekin, egin duen lan honetarako.

Bestalde, Tamara Sastre Emekiko lehendakariak eta Igor Enparan Hondarribiko alkateak azaldu dutenez, martxoaren 4tik 11ra arte egingo diren ekitaldien programa datorren astean aurkeztuko da.