Migratzaileen gaiak puri-purian egoteari inoiz utzi ez badio ere, gutxitan hitz egin da pertsona migratzailearen ikuspuntutik, horrexegatik Amets Arzallusek idatzitako Miñan liburuak izan zuen hainbesterako harrera ona. Ibrahima Balderen bizitza kronikaren bitartez primeran ulertzen eta laburbiltzen baita pertsona migratzaileen odisea.

Ibrahima kamioi batean zebilen aprendiz Ginean, baina alde batera utzi behar izan zuen bere bizitza anaia txikia Europan bilatzeko. Europarako bidea ez zen erraza izan: basamortua gurutzatu; pasatzaile, polizia, bahitzaileekin topo egin; egarria, gosea, mina ezagutu zituen eta baita deshumanizazioa ere. Orain, Miñan liburuan irakurritakoa oholtzaren gainean ikusi ahalko da Donostiako Gasteszenan azaroaren 13tik 17ra bitartean Artedrama Plataformaren eskutik. 
Eszenatoki gainean izango dira Sambou Diaby, Eihara Irazusta, Ander Lipus eta Mikel Kaye. Gipuzkoako Kale Nagusian azken bi aktoreekin hitz egin dugu antzezlanaren gainean eta Donostian espero duten harrerai buruz.