Inbertsio berdeak sustatzeko proposamena aurkeztu du Bruselak

Europako Batzordeak atzo aurkeztu zituen industria garbietan inbertsioak sustatzeko proposamenaren ildo nagusiak, Ameriketako Estatu Batuak edota Txina bezalako potentziek euren industriari txertatu dizkioten diru-laguntza berdeen dopinari aurre egin asmoz.

Ursula von der Leyen, Batzordeko presidenteak, Davoseko (Suitza) foro ekonomikoan iragarri zuen planarekin bat dator zirriborro hori, energia berriztagarrietan inbertitzea errazteko baimenak bizkortzea eta Estatuaren lagun-tzak malgutzea ardatz hartuta, besteak beste.

Otsailaren 9an eta 10ean egingo duten bileran Europar Batasuneko liderren eztabaida bideratu nahi duen lehen txostena da, abenduko bileran Bruselari egindako eskaria beteaz.

“Eztabaidarako dokumentu bat da, bertan ez baitaude 2050ean industriak neutraltasun energetikoaren helbururantz bideratzeko, Batzordeak gure estrategiaren esparruan egingo dituen proposamen guztiak”, adierazi zuen joan den astearteko prentsaurrekoan Eric Mamer Europako Batzordeko bozeramaileak.

Beraz, Bruselak ez du neurrien inguruko xehetasunetan sakonduko Hogeita zazpien ekarpenak entzun arte, eta martxoaren amaieran egingo den Europako hurrengo goi-bilerarako, orduan bai, proposamen zehatzekin itzuliko da.

Von der Leyenek ezarritako helburuen artean, Zero Industria Garbiaren Lege berri baten proposamena gailentzen da; txipei buruzko lege-proiektuaren antzekoa izango litzateke, eta 2030etik aurrerako Europar teknologia garbirako helburu argiak ezarriko lituzke.

lehengaien kluba

Lehengaien kluba Lehengai Kritikoen Klub bat sortzea ere proposatzen da, antzeko ideiak dituzten bazkideekin elkarlanean – Estatu Batuetatik hasi eta Ukrainaraino –, hornikuntza-kateak kolektiboki indartzeko, hornitzaileak dibertsifikatzeko, EBren Txinarekiko mendekotasuna murrizteko -%98koa da-, bai eta funtsezko teknologiak sortzeko ere: besteak beste, energia eolikoa sortzeko, hidrogenoa biltegiratzeko edo bateriak garatzeko.

Egitasmoaren beste helburuetako bat, estatuetako laguntzei buruzko Europako arauak aldi baterako malgutzea izango da, laguntza horiek “bizkortzeko eta sinplifikatzeko”, esan zuen.

Adibidez, zerga-arintzearen eredu errazak eta teknologia garbiak ekoizteko instalazioetarako laguntza espezifikoak aurreikusten dira, AEBk teknologia garbietan inbertitzeko proposatutako 369.000 milioi dolarrekoa bezalako atzerriko diru-laguntzetatik eratorritako deslokalizazio-arriskuei aurre egin ahal izateko.

Inolaz ere, “estatu-laguntza horiek, estatu kide gutxi batzuek bakarrik erabili ahal izango duten irtenbide mugatua” izango dela azpimarratu zuen Von der Leyenek; eta, epe ertainean, AEBtako diru-laguntzek Europako ekonomian duten eraginari aurre egiteko, funts subirano bat sortu beharko dela, merkatuaren “zatiketa” saihesteko.