Industria-jarduerak % 2,0 egin du behera urtarrilean

Araba, Bizkaia eta Gipuzkoako industria-produkzioa 2023ko urtarrilean 2022ko hil berekoa baino % 2 txikiagoa izan da, lan-egutegiko baldintza homogeneoetan, Eustatek prestatutako datuen arabera.

Hala, eta ildo beretik jarraituz, urtarrileko indizeak, ondasunen helmuga ekonomikoaren arabera, eta 2022ko urtarrilarekin alderatuta, % 1,6 egin du gora Ekipo-ondasunetan; haietan, motordun ibilgailuen fabrikazioa, lokomotorren eta trenbide-materialen eraikuntza eta eraikuntza aeronautikoa edo ontzigintza sartzen dira.

Kontsumo-ondasunek, bestalde, urte arteko portaera positiboa izan dute:% 4,2ko igoera izan dute sektorean, oro har, nagusiki Kontsumo-ondasun iraunkorren ekoizpenean % 8,6ko igoera izan delako; haietan sartzen da, besteak beste, altzarien eta etxeko aparatuen fabrikazioa. Kontsumo-ondasun ez-iraunkorren ekoizpenak % 3,2ko igoera izan du. Haietan honako jarduera hauek sartzen dira: elikagaien prozesatua eta kontserbazioa, garbitasuneko eta higienerako produktuen fabrikazioa, farmaziako produktuak eta arropen jantzigintza.

"Maila bereiziago batean, Euskal AEko industrian pisurik handiena duten sektoreen artean, 2023ko urtarrilean urte arteko hazkuntza handiena izan dutenak honako hauek izan dira: Makinak eta ekipoa, % 7,1 hazi da; Elikadura industriak, edariak eta tabakoa % 4,2; eta Garraio-materiala % 3,9", esan eta ondorioztatu dute txostenean: "Bestalde, jaitsi egin da ekoizpena honako sektore hauetan: Energia elektrikoa, gasa eta lurruna, % 22,9; eta Zurgintza, papera eta arte grafikoak sektorean ekoizpenaren beherakada % 7,6koa izan da".