'Innato' telesailaren eszenak filmatuko dira Gasteizko udaletxean San Prudentzio egunean

Elena Anaya eta Imanol Arias aktoreak protagonista dituen Netflix plataformaren Innato telesailaren hainbat eszena filmatuko dira Gasteizko udaletxearen eraikinean apirilaren 28an, San Prudentzio egunean, Maider Etxebarria alkateak iragarri duenez.

Udaletxeko korridoreak, eskailerak eta batzorde eta bilera gelak filmaketara lantalde teknikoaren lantoki bihurtuko dira egun horretan. Horrela, udaletxeko bulegoak "egoitza judizial" bihurtuko dira nazioarteko proiekzioa duen zortzi kapituluko telesailerako, AEBetan ere ikusi ahal izango baita.

Etxebarriaren iritziz, Innato telesailaren filmaketa Gasteiz ikus-entzunezkoen industrian hartzen ari den "dimentsioaren" beste adibide bat da. Ildo horretan, David Perez Sañudoren 'El Sacamantecas' lana filmatu zuten duela gutxi, eta joan den astean gauza bera gertatu zen Ana Murugarrenen 'Cuerpos locos' komediarekin.

"Gasteiz filmaketen agertoki gisa eta ekoizpen horietan lankidetzan aritzeko eta lan egiteko prestakuntza handia duten ikus-entzunezko sektoreko enpresa eta profesionalekin hiri gisa sustatzeko lan bikaina egiten ari gara", nabarmendu du alkateak.

Vitoria-Gasteiz Araba Film Commission erakundean Gasteizo Udalak eta Arabako Aldundiak partekatzen duten lanari esker, udara arte hamar ekoizpen baino gehiago fimatuko dira Erdi Aroko Hirigunean, hiriko eta beste herri batzuetako jauregietan eta Arabako urtegietan.

"Oso leku garrantzitsua egin diogu ikus-entzunezkoen industriari, eta horrek bultzada handia emango dio jarduera ekonomikoari eta Gasteizko eta Arabako sustapenari", esan du Etxebarriak.