Inude eta Artzainen konpartsak Irungo kaleak alaituko ditu igandean

Inauteriak hastear direla gogoratzeko, Eraiki Dantza Taldearen Inude eta Artzainen konpartsak Irungo kaleak alaituko ditu igande honetan. Desfilea eguerdiko 12.00etan irtengo da Santiago kaletik eta Eskola kalea, Eliza kalea eta San Juan plaza zeharkatuko ditu, azken honetan etenaldi txiki bat egingo duelarik. Ondoren, desfileak Kale Nagusitik, Foru kaletik eta Colon pasealekutik jarraituko du. Ohi bezala, Zabaltza plazan, Irungo Kontserbatorioko Orkestraren erritmoan, garaiko eszena ezberdinak antzeztuko ditu. Azkenik, desfilea Luis Mariano kalean amaituko da.

Eraiki Dantza Taldeak herritarrei dei egiten die desfilea ikustera joan daitezen.

Azken entsegua

Inauterien hasierari aurrea hartuz, otsailaren 22an, larunbata, Zabaltza plazan dantzatuko dituen dantzen azken entsegua egingo du Eraikik. Ohi bezala, entsegua Behobiako plazatxoan egingo da eguerdiko 12.00etan. Euria egingo balu, entsegua Gazteluzar ikastetxeko gimnasio estalian egingo da. Azken entsegu hau, joan den larunbatean egin zen lehena bezala, Inude eta Artzainen konpartsa osatzen duten eta Zabaltza plazan dantzatzen duten dantzariei zuzenduta dago.