Irungo eskola publikoetako irakasleek bat egin dute protesta egiteko

Euskal hezkuntza publikoko irakasleen grebaren harira, Irungo eskola publikoetako irakasleak kalera atera dira gaur, jasaten ari diren protokolizazioa dela eta lan-karga asko handitu zaiela eta baliabideak ez direla nahikoak salatzeko. Urteetan lehen aldiz antolatzea lortu ondoren, berrehun lagun inguru bildu dira San Juan plazan.

“Eskakizunak gero eta handiagoak dira eta ez gara iristen”, azaldu du Artizar Susperregi Dunboako irakasleak. “Baliabideak handitzen ari direla esaten ari dira behin eta berriro, baina hori ez da egia, guk ez dugu ikusten”, esan du.

Irakasleen egoerak ikasleei zuzenean eragiten diela ere adierazi dute. “Ez dugu haiekin egoteko kalitatzeko denborarik eta baliabiderik”. Ildo horretan, hobekuntzak ikasleen onerako garrantzitsuak eta beharrezkoak direla azpimarratu dute.

Irakasleen haserrea

Gainera, irakasleak haserre agertu dira atzo gaur lanera joango ziren ala ez jakin gabe oheratu zirelako. “Adarjotze bat da eta lotsagarria da”, adierazi dute. Izan ere, Eusko Jaurlaritza eta sindikatuak negoziatzen aritu ziren goizeko ordu bi eta erdiak arte.

Negoziazioei dagokienez, Susperregik azaldu du "hitz politak" egon direla, baina zirriborro bat idazteko eskatu denean gauzak "asko lausotu" direla. "Hitz politak haizeak eramaten ditu eta ezin gara horrekin konformatu".

Gurasoen gertutasuna

Bestalde, gurasoen gertutasuna nabaritu dutela nabarmendu dute. “Guk gure eskolan ostiralero elkarretaratze txiki bat egiten dugu eta sentsazioa behintzat bada ulertuak garela. Horrek ere nolabaiteko babesa ematen digu”.