John Fogerty Gasteizko 23. Azkena Rock Festival jaialdian izango da

John Fogerty Creedence Clearwater Revival taldeko buru izandakoak Gasteizko Azkena Rock Festival jaialdiaren 23. edizioan joko du, eta kartelburu izango da Manic Street Preachers eta The Flaming Lips taldeekin batera, antolakuntzatik jakinarazi dutenez.

Fogertyrekin batera, Margo Price, C.O.F.F.I.N, The Lemon Twigs eta Sarria ere ageri dira ekainaren 19an, 20an eta 21ean Gasteizko Mendizabalan egingo den jaialdiko artisten azken iragarpenean.

Horiek guztiak, aldi berean, aurretik iragarritako Lucinda Williams, Melissa Etheridge, Richard Hawley, The Hellacopters, P.I.L., Turbonegro, Buzzcocks, The Chesterfilds Kings edota Dead Kennedys moduko taldeei gehitu zaizkie.

Jaialdiaren antolakuntzak nabarmendu du John Fogerty "amerikar harribitxi peto-petoa" dela. Creedence Clearwater Revival taldeko buru zelarik, soinu propio eta bereizgarria sortu zuen, blues, country eta rock and roll estiloak bere lirika bereziarekin uztartuta. Rock & Roll Hall of Fame ezaguneko partaideetako bat da, eta 100 milioi disko baino gehiago saldu ditu bere ibilbide luzean.

Gainera, Azkena Rock Festival jaialdiko publikoarekin zuen zorra kitatuko du, 2020an pandemia zela-eta bertan behera geratu zelako bere emanaldia. "Egia esan, berriro ikusteko eta entzuteko irrikaz geunden, hiru urte lehenago Creedence taldearen klasikoak interpretatu zizkiguneko oroitzapen atseginaren ondoren", azaldu dute.

AEBtik helduko da Margo Price ere, eta lehen aldiz izango da jaialdian, kontzertu esklusiboa eskainiz. Loretta Lynn edo Emmylou Harris handien ondarea ahaztu gabe, Margo Price abeslari eta konpositorea "belaunaldi oso baten kultuzko artista eta talentua" da, abestietan lantzen dituen gaiak askotarikoak izanik, hala nola genero arrakala soldatetan edo estatubatuar nekazarien egoera latza.