Jundizko industrialdean kamioientzako aparkalekua egingo dute

Gasteizko Udalak 4,3 milioi euroko inbertsioa egingo du Jundizko industrialdean kamioientzako aparkaleku segurua egiteko, Maider Etxebarria alkateak prentsaurreko batean iragarri duenez.

Hain zuzen, GILSA lurzoru industriala kudeatzen duen udal sozietateak hiru lursail Norpetrol S.L. enpresari esleitzeko akordioa sinatu zuen ostegunean, azpiegitura berria eraikitzeko. Enpresa horrek dagoeneko badu gasolina zerbitzugune bat Jundizko industrialdean, eta erabaki du 1.160.000 euro gehiago inbertitzea hirian, 12.000 metro koadroko lursailak erosita.

Bada, aparkalekuak kamioientzako 90 plaza izango ditu, eta, ekipamenduaren osagarri gisa, enpresak nabe bat eraikiko du aldez aurretik erositako lursailean, garraiolarientzako komun, aldagela, denda eta atseden hartzeko gunearekin, eta Interneterako doako sarbidearekin.

"Eragiketa honi esker, proiektua gauzatzeko 4.300.000 euro gehiago inbertituko direla bermatu dugu, eta zuzeneko hamar lanpostu sortzea sustatuko dugu, zeharkakoez gain", azpimarratu du Etxebarriak.

Bideozaintza sistemak, ibilgailu elektrikoetarako karga guneak, energiaren erabilera optimizatzen duten sistema automatizatuak, eguzki plakak eta led argiztapena izango ditu aparkalekuak.

"Zirkulazioaren eta aparkalekuen kudeaketa kontrolatuak gutxitu egingo ditu mugimenduan dauden ibilgailuen kontrolik gabeko isuriak eta horretarako egokitu gabeko eremuetan aparkatutako kamioiek sortutako kutsadura bisuala, eta Jundizko industrialdearen garbitasun orokorra hobetzen lagunduko du", azaldu du.