Laboral Kutxa-Euskadi Fundazioak emakumezkoen Espainiako Vuelta jokatuko du

Emakumezkoen Espainiako Vueltaren antolakuntzak 2025ko edizioa jokatuko duten taldeen zerrenda argitaratu du, eta horien artean dago Laboral Kutxa-Euskadi Fundazioa.

Lasterketak WorldTeams kategoria nagusiko 13 talde izango ditu irteeran, eta ProTeams eta Continental Teams kategorietako zortzi talde gonbidatu ditu, horien artean Laboral Kutxa-Euskadi Fundazioa.

Emakumezkoen Espainiako Vuelta by Carrefour.es maiatzaren 4tik 10era bitarteabn jokatuko da, eta zazpi etapen ibilbideak martxoaren 10ean aurkeztuko ditu Bartzelonan, irteera ofiziala hartuko den hirian, hain zuzen ere.

Bestalde, Itzulia Basque Country txirrindularitza lasterketaren antolakuntzak 64. edizioan parte hartuko duten 24 taldeak iragarri ditu ostegun honetan, eta sei gonbidatuen artean Euskaltel-Euskadi, Kern Pharma eta Caja Rural-RGA Aseguruak euskal taldeak daude.

Horiekin batera, UCI World Team kategoriako 18 taldeak izango dira Itzulian, hau da, Alpecin-Deceuninck, Arkea-B&B Hotels, Bahrain Victorious, Cofidis, Decathlon Ag2r La Mondiale Team, EF Education-Easypost, Groupama-FDJ, Ineos Grenadiers, Intermarché-Wanty, Lidl-Trek, Movistar Team, Red Bull-Bora-Hansgrohe, Soudal Quick-Step, Team Jayco Alula, Team Picnic Postnl, Team Visma | Lease A Bike, UAE Team Emirates-XRG eta XDS Astana Team.

Gainera, Burgos-Burpellet-BH, TotalEnergis eta Tudor Pro Cycling Team izango dira Gasteiztik abiatuko den Itzuliaren 2025ko edizioko beste hiru talde gonbidatuak.

Modu honetan, 168 txirrindulari lehiatuko dira apirilaren 7tik 12ra jokatuko diren sei etapetan, UAE Team Emirates XRG taldeko Juan Ayuso espainiarrak iaz irabazi zuen txapela lortzeko.