Lasarte-Oriak eta Ttakun elkarteak hitzarmena berritu dute

Actualizado hace 2 minutos

Lasarte-Oriako Udalak eta Ttakun Kultur Elkarteak aste honetan 2024-25 ikasturterako lankidetza hitzarmena sinatu dute.

Hitzarmenak zazpi programa gauzatzea jasotzen du, eta horretarako, Ttakun Kultur Elkarteak 210.000 euro pasatxoko dirulaguntza jasoko du.

Euskaraldia

2024-25 hitzarmenaren berrikuntza nagusia Euskaraldiaren IV. edizioaren antolaketa izango da. Aurtengo edizioa maiatzaren 15etik 25era bitartean izango da eta aurretik antolaketa lanak izango ditu.

Gainontzeko sei programak hauek dira: Gazte eta Amaraun kluba, Kuadrillategi, Gurasoleku, Solaskide solasbide, Euskara eta kultura eskutik eta Txintxarri aldizkaria.

Euskara

Lankidetza hitzarmen hau hizkuntza gutxitua den euskara berreskuratzeko lankidetza publiko-sozialaren adibide bat da. Hitzarmen honen bidez, Lasarte-Oriako Udala eta Ttakun Kultur Elkartea elkarrekin ari dira lanean udalerria euskalduntzeko, lan-ildo nagusiak eta programa zehatzak adostuz eta gauzatuz.

Konpromisoa

Aurkezpenean, Agustín Valdivia alkateak hitzarmen honen garrantzia azpimarratu zuen, euskararen sustapenean laguntzeko Lasarte-Orian: "Akordio honek gure konpromisoa indartzen du euskara Lasarte-Oriako eguneroko bizitzan normalizatzeko. Programa hauen bidez, euskara hainbat eremutan egotea errazten dugu, espazio eta aukera gehiago eskainiz haren erabilerarako".

Elkarlana

Bestalde, Euskara zinegotziak, Estitxu Alkortak, Udalaren eta Ttakun Kultur Elkartearen arteko lankidetzaren balioa nabarmendu du: "Elkarlan honi esker, herritarren hainbat sektorera iritsi gaitezke, haurtzarotik helduarora arte, eta euskararen erabilera sustatu dezakegu aisialdian, kulturan eta hezkuntzan".

Sinaduran, Ttakunen izenean, Mari Karmen Ormazabalek parte hartu zuen.