Mankomunitateak egindako eskaera berretsi du Zumarragak

Zumarraga – Urola Garaia Mankomunitateak eta Gabiriako Udalak gutun bat bidali diote Gotzone Sagardui Osasun sailburuari eta Rosa Perez Osakidetzako zuzendariari. Bertan, Zumarragako anbulatorioa egunero eta eguneko 24 orduetan irekitzeko eskatu diete. Ostegunean, Zumarragako Udalak eskaera berretsi zuen. Alderdi guztiek alde bozkatu zuten. Osoko bilkuran anbulatorioko Etengabeko Arreta Gunea (EAG) egunero eta eguneko 24 orduetan irekitzearen aldeko plataformako kideek ere parte hartu zuten.

Gutunean Mankomunitateko lau alkateak eta Gabiriakoa “kezkatuta” ageri dira egun bizi den egoeragatik eta pandemia aurreko egoerara itzultzea eskatzen dute. Hau da, anbulatorioa egunero eta eguneko 24 orduetan irekitzea. Egun, astelehenetik ostiralera 8.00etatik 20.00etara irekitzen da eta larunbat eta igandeetan 9.00etatik 21.00etara.

Osoko bilkuraren amaieran Belen Baztarrika plataformako kideak hartu zuen hitza. Pozik azaldu zen, Mankomunitateak gutuna bidali duelako. “Beti eskatu dugu Mankomunitateak indarra egitea eta, beraz, asko pozten gaitu”, aipatu zuen.

Ospitalea

Lanean jarraituko dutela aurreratu zuen. “Bi urte baino gehiago daramatzagu lanean. Jarraitu egingo dugu, lortuko dugun ilusioa baitugu. Oso kezkatuta gaude, geroz eta murrizketa gehiago daudelako, baina 25.000 biztanle gara eta anbulatorioa eguneko 24 orduetan zabalik egotea behar dugu. Guk bidali genuen azken gutunean Gotzone Sagarduik ospitalera joateko erantzun zigun, baina ezin dugu larrialdietako zerbitzua behar bezainbesteko larritasuna ez duten larrialdiekin kolapsatu. Bergaran eta Errenterian herritarrek beraien eskaera lortu dute, udalen laguntzarekin”.

Bukatzeko, lehen mailako arreta zaintzeko eskatu du. “Ingalaterran hala hasi zen osasun zerbitzu publikoaren desegitea. Osasuna ez da negozioa, inbertsioa baizik. Hurrengo belaunaldiek ez diezagutela esan ez genuela ezer egin egoera okertu zenean”.