Miribillak kirol askotako pista berri bat dauka Gernika Lorategian

Miribilla auzoko Gernika Lorategian kirol pista berri bat ireki berri du Bilboko Udalak. Bertan, hainbat kirol-modalitate praktikatu daitezke. Obrak azaroan hasi ziren Ibaiondo barrutiko jolas- eta kirol-instalazioak hobetzeko eta lau hilabete eta gero, hainbat bilbotarrek instalazio berriak erabili ditzakete haien aisialdia pasatzeko.

Perimetroa osorik itxita dago. Horrela, pista berriaren erabiltzaileen eta parkean dabiltzan gainerako pertsonen segurtasuna bermatuko da. Perimetro horrek, gainera, kantxa alboko ibilgailuen trafikotik isolatzen du.

Kantxa hau eraikitzeko, lehendik zegoen parterre bat egokitu da –trapezoidala da eta oinezkoentzako ibilbideez inguratua dago–. Lorategi-eremua, beraz, instalazio berri batera egokitu da eta sarbide bat prestatu da bertan.

Pista egiteko kendu den landare-lurra ezpondetan erabili da ondoren, eta kaltetutako belardi guztian belarra berriro erein da, obra amaitu ondoren.

Azaroan hasi ziren obra hauetan, bi saski eta aretoko futboleko ateak, eta ikusleentzako hamar harmaila-elementu ipini dira.

Era berean, euri-urak biltzeko sare berri bat jarri da, eta argiteria hobetu.

Zehazki, kantxa argiztatzeko, 7 metroko lau zutabe aukeratu dira, eta bakoitzaren gainean bi led proiektagailu. Nolanahi ere, argiztapena programatuta dago. Horrela, 22:30etik aurrera intentsitatea murrizten da eta ezin da instalazioa erabili.

Jokatzeko lerroak margotu dira, baina kantxaren kolorea udaberrian ipiniko da, eguraldiak ahalbidetzen duenean.

Obra hori egiteko aurrekontua 2022ko parte-hartze bidezko aurrekontuen barruan dago.

Bilbotar guztientzat zabalik dagoen prozesua da, Udalaren aurrekontuaren zati bat zertan erabil daitekeen proposatu dezaten. Udalak 2 milioi euro erabiltzen ditu aurrekontu horietan